اسلام آباد۔ 31 مئی (اے پی پی) پاکستان چاگڑد ءِ پلاسٹک نا کچٹی آن پاک کننگ کن کوشست کروک آ ملک آتا صف اٹی اوار مسنے، دا چرجوئی ٹی بنجائی دارالحکومت اسلام آباد اٹی پولی تھین بیگ آتا تیاری، ہلنگ و بہاکننگ و کاریم اٹ اتنگ آ پورو پابندی خلنگانے، دابابت کانود آ عملدرآمد کرفنگ نا مہم اٹی 3500کلوگرام پلاسٹک بیگ آتے ضبط و خلاف ورزی کروک آتے 30لکھ روپئی جرمانہ خلنگانے۔ وزیراعظم نا خصوصی کمکار موسمیاتی بدلی ملک امین اسلم دابابت اے پی پی ءِ پارے کہ اسلام آباد اٹی 14 اگست 2019آن پولی تھین بیگ آتا تیاری، ہلنگ وبہاکننگ و کاریم اٹ اتنگ آ پوروی پابندی خلوک ءِ وخت اس کہ دانا گیگ بدل کن قدرتی چاگڑد اٹ تحلیل مننگ نا لائخی تخوک آ چاگڑد دوست تھیلہ غاتا تیاری و کاریم اٹ اتنگ نا است بڈی ءِ کننگ انگ ءِ۔ اوپارے کہ داپابندی بھازالمی ئس انتئے کہ پلاسٹک بیگ آک انسانی جا ن جوڑی، جنگلی حیات، قدرتی چاگڑد و حیاتیاتی تنوع کن ضرر رساں مننگ تون اوار اوار گنجان آباد شارتے ٹی نکاسی آب اٹ اڑاند نا سوب شاری نوکاپ نا ہم بھلا ذریعہ ءِ۔ اواسہ پٹ وپول اسے نا حوالہ ءِ ترساپارے کہ اگہ پلاسٹک بیگ آتا کاریم اٹ اتنگ اٹ ودکی نا ہنداکچ سلیس تو 2050اسکان سمندر آتے ٹی آبی ساہدار تیان زیات پلاسٹک بیگ آک تارخلور۔ ملک امین اسلم پارے کہ 1992آن پد 15 درسد اوسط ودکی اتون ملک اٹی سالانہ 55 ارب پلاسٹک بیگ تیار کننگ انگ ءِ وخت اس کہ شدید خانہ جنگی نا گواچی مروک آ کینیا کون آ ملک اٹی ہم پلاسٹک بیگ آتیا پورو پابندی خلنگانے۔ اوپارے کہ اسلام آباد اٹی وزارت موسمیاتی بدلی، چاگڑدی رکھ انا ادارہ پاک ایپا و ضلعی انتظامیہ نا اسیجائی ٹیمک پلاسٹک بیگ آتیا خلوک پابندی آ عملدرآمد ءِ پک کننگ نا زمواری ءِ سرتننگ ءُ، کورونا دین انا تالانی و لاک ڈاؤن نا حالیت آتے ٹی دامہم اٹی گڑاس وخت تعطل بسنے ولے داسہ تعلقدار ٹیمک پابندی آ عملدرآمد ءِ پک کننگ کن ولدا متحرک مسنو۔ اوپارے کہ پلاسٹک بیگ آتا مرحلہ وار چٹفنگ و اوفتا گیگ بدل کن غٹ شریدار آتون پورو سلابت کننگانے تانکہ داکاروبار تون وابستہ مخلوق نا روزگار زہمی مف بلکن پین مخلوق، خاص وڑاٹ زالبول و خواجہ سرا تیکن باعزت روزگار نا وارخواہی ودی کننگ مرے۔امین اسلم پارے کہ صوبہ غاتے ٹی ہم پلاسٹک بیگ آتیا پابندی نا بابت گام گیج کننگ انگ ءِ۔
