اسلام آباد۔ 31 مئی (اے پی پی) بنجائی وزیر سائنس و ٹیکنالوجی شبلی فراز تون پاکستان اٹی تعینات ہنگری نا سفیر بیلافایزکاس دوشنبے نادے آ داڑے اوڑدہی کرے۔ اوڑدہی ٹی فریق آک سائنس و ٹیکنالوجی نا بشخ اٹی ہڑتوم آ کنڈآتا تعلقداری تے پین مون آ دننگ نا گرج آ امنا کریر۔ ہنگری نا سفیر بنجائی وزیر ءِ اینخو نا سال نومبر اٹی مروک آ پلینٹ بڈاپسٹ 2021، ایکسپوو سمٹ اٹی بشخ ہلنگ نا سلہ ہم خلک۔ بنجائی وزیر پارے کہ پاکستان موسمیاتی بدلی آن غٹ آن زیات زہمی ملک آتے ٹی اوار ءِ۔ ہنداخاطرآن نناچکار دیر، کشت وکشار و خور انا فراوانی آٹے۔ شبلی فراز پارے کہ پاکستان دیر انا ویل آ اسہ قومی کانفرنس اس اڈتننگ ءِ اوکان پد اسہ جہانی کانفرنس اس اڈتننگک۔ اوپارے کہ ہڑتوم آ ملک آک اسہ ایلو نا آزموندہ غاتیان بھاز گڑا ہیل کننگ کیرہ۔ بنجائی وزیر ہنگری نا کنڈآن پاکستانی طالب علم آتے کن اسکالرشپ پروگرام نا ستاءِ کرے و پارے کہ دا طالب علم آک پاکستان اٹی ہنگری نا سفیر مریرہ۔ بنجائی وزیر نا کنڈآن تکنیکی و سائنسی بشخ آتے ٹی انٹرنشپ و ٹریننگ ءِ ہم داپروگرام تے ٹی اوار کننگ نا سلاہ تننگا۔ ہنگری ناسفیر پارے کہ ہڑتوم آ ملک آک سائنس و ٹیکنالوجی نا بشخ اٹی چندی ایم او یوتیا دستخط کرینو۔ ہنگری نا سفیر ہڑتوم آ ملک آتا نیام اٹ تعلقداری تے پین سوگو کننگ کن کوشست آتے برجاتخنگ نا عزم کرے۔
