اسلام آباد۔ 31 مئی (اے پی پی) گاڈی تا ہلنگ(آٹوفنانسنگ) کن تروک آ وام تے ٹی اپریل 2021ء ٹی 36 درسد آن زیات ودکی مسنے۔ اسٹیٹ بینک آف پاکستان(ایس بی پی) نا حساب وکتاب نا رداٹ اپریل 2021ء ٹی آٹوفنانسنگ نا مد اٹی 293ارب روپئی نا وام فراوان کننگانے وخت اس کہ اپریل 2020ء ٹی گاڈی تا ہلنگ کن تروک آ وام تا کچ 215ارب روپئی ئسک۔ ہنداوڑاپریل 2020ء نا مقابلہ ٹی اپریل 2021ء ٹی آٹوفنانسنگ اٹ 78 ارب روپئی یعنی 36.4درسد نا نمان ودکی ریکارڈ کننگانے۔ حوال نا رداٹ مارچ 2021ء نا مقابلہ ٹی اپریل 2021ء ٹی گاڈی تا ہلنگ کن وام تا فراوانی ٹی 2.8درسد ودکی مسنے۔ یات سلے کہ مارچ 2021ء ٹی آٹوفنانسنگ نا کچ 285ارب روپئی ئس ہرااپریل 2021ء ٹی 8 ارب روپئی نا ودکی آن 293ارب روپئی اسکان ودا۔ یات سلے کہ اسٹیٹ بینک آف پاکستان نا کنڈآن پالیسی ریٹ اٹی کمتی ٹی آٹوفنانسنگ اٹ نمان ودکی مسنے۔ گاڈی تیار کروک آ ادارہ غاتا تنظیم پاما نا رپورٹ نار داٹ اینخو مالی سال انا اولیکو دہ تُو اٹی آٹوموبائلز (کار) تا بہاکننگ 54 درسد ودکی آن تدوک آ مالی سال انا ہنداوخت انا 97 ہزار 900یونٹ بہاکننگ نا مقابلہ ٹی برجا مالی سال اٹی جولائی آن اپریل 2020-21ء ٹی اسہ لکھ 51 ہزار 178یونٹ اسکان ودانے۔
