اسلام آباد۔ 30 مئی (اے پی پی) وزیراعظم عمران خان پارینے کہ اپوزیشن اسہ نظریہ سے کن آخا بلکن تینا کرپشن ءِ بچفنگ کن یکجامسنے، تینا برخلاف کرپشن نا مقدمہ غاتے چٹفنگ کن بلیک میل کننگ ءُ، اوفتا خیال ئس کہ حکومت دا زرگزرانی تنکی آن پیش تمنگ کپک ہرافتے اوفک ہلار و ڈبنگک، نن مشکل وخت آن پیش تمانن، غٹ اقتصادی ٹک آک مثبت پیدواری کننگ ءُ، ملک زرگزرانی وڑاٹ مون آ ہِننگ ءِ۔ داخیال آتا درشانی ءِ او یک شنبے نادے آ ”نما وزیراعظم نم تون“ پروگرام اٹی شاری تاکنڈآن ٹیل فون آ ہریفوک آ سوج آتا ورندی ءِ ترساکرے۔ وزیراعظم عمران خان پارے کہ ہراتم نن حکومت ءِ سنبھالان تو ملک ءِ مشکل حالیت مون تروک ئس،ننے میرات اٹ بے تحاشا ویل ملا، اسہ حکومت اسے ہم داخہ بھلو نسخان اس نء وام تا داخہ بھلوبھاریم اس میرات اٹی ملا ہرافتے تون ننے مون تروک ئس، ننے ملک ءِ ہم چلیفوئی ئس و وام تا بھلو قسط ہم تروئی ئس، ای اولیکو دے آ قوم اتون پاریسٹ کہ ننے مشکل حالیت آتیان گدرینگوئی تمک انتئے کہ نن خواتہ مننگ والائسن۔ وزیراعظم پارے کہ اپوزیشن اولیکو دے آن پاننگ ءِ کہ ننا حکومت نابود ءِ ہنداخاطرآن نن اودے کشن، دافوج ءِ پارہ کہ اونا حکومت ءِ بٹ، اوفتا خواست ءِ کہ اوفتے این آر او تننگے، ورنہ داحکومت ءِ چلینگ کن الیپسہ، اوفتا اندازہ الوکہ کہ زرگزرانی حالیت گچین مریک و گروتھ ریٹ 4 درسد اسکان مریک، داسہ دااختہ مسنو، ہنداخاطرآن پاننگ ءُ کہ اقتصادی حساب وکتاب ہی غلط ءِ۔ اسہ سوج اسے نا ورندی ٹی وزیراعظم پارے کہ بھارت تون تعلقداری تے ہمووخت اسکان مست آنبار اتنگ مفک ہراتم اسکان بھارت 5اگست نا تینا گام ءِ پدی ہلپک، اگہ نن کشمیر ءِ گوجالسا بھارت تون تعلقداری تے مست آنبارکینہ تو داکشمیر ناالس تون بھلوغداری اس مریک۔ وزیراعظم پارے کہ فلسطین نا ویل انا ایسر فلسطینی تے اوفتا حق تننگ و اِراریاست قائم کننگ ءِ۔ اسہ پین سوج اسے نا ورندی ٹی وزیراعظم پارے کہ ملک اٹی پوسکن آ دیری کوڑی تا تفنگ نا گرج ءِ، ننا حکومت بروک آ 10سال اٹی 10ڈیم جوڑ کننگ ءِ، دیر انا بشخنگ کن پوسکن ءُ ٹیلی میٹری سسٹم اس اتنگ اُن، ضرورت تما تو سندھ اٹی دیر انا ساف بشخنگ کن رینجرنا کمک ءِ ہم دوئی کننگک۔
