اسلام آباد۔ 30 مئی (اے پی پی) وزیراعظم عمران خان نا صاف و سرسوز پاکستان ویژن ءِ مون آ تخسا 10 بلین ٹری سونامی نا پروگرام نارداٹ دنیا نا بڑزانگا سرد ریگستان”صحرائے کٹپانا“ ءِ سرسوز و شاداب علاقہ ٹی بدل کننگ کن 2 لکھ 80 ہزار نیال خلنگانے۔ ریگستان اٹی شجرکاری نا مسخت بنجر ڈغار ءِ سوزاٹی بدل کننگ تون اوار اوار درجہ حرارت اٹی ودکی و ماحولیاتی انحطاط ءِ توننگ نا ءِ۔ وزیراعظم نا 10 بلین ٹری سونامی پروجیکٹ ناکمامدارآک پاکستان نامہمانداری ٹی جہانی یوم ماحولیات نا دود آتیان مست داڈٹ آ پیش رفت ءِ بھاز اہم گوندسا پارینو کہ داوڑنا گام گیج قدرتی ماحول نا رکھ و مون آ دننگ نابابت جہانی کہول آ پاکستان نا قائدانہ کڑد انا عکاسی ءِ کیک۔ 10بلین ٹری سونامی پروگرام نا رداٹ پاکستان ءِ سرسوز ملک اس جوڑ کننگ وزیراعظم عمران خان نا ویژن ءِ۔ داپروگرام نا رداٹ محکمہ جنگلات ریگستانی علاقہ ءِ زیات آن زیات شجرکاری نا کمک اٹ سرسوز علاقہ ٹی بدل کننگ کن کوشست کننگ ءِ۔ اوپارے کہ دامسخت کن بیرہ تیرمہ2021ء نا شجرکاری مہم اٹی 35 ہزار نیال خلنگاوخت اس کہ ٹین بلین ٹری سونامی پروجیکٹ نا بناآن پد 2 لکھ 80ہزار نیال خلنگانے۔ صحرائے کٹپاناسکردو، گلگت بلتستان اٹی واقع ءِ و دادنیا نابڑزانگاریگستان ءِ ہراتینا یکتا دنگ، خدوخال و موسمی حالیت آتا سوب آن سرد ریگستان پاننگک۔ دانا درجہ حرارت اکتوبر اٹی 8 آن26ڈگری سینٹی گریڈ وخت اس کہ دسمبر آن جنوری ٹی منفی10ڈگری سینٹی گریڈ اسکان تمک۔ سرد ریگستان نا موسمی و ڈغاری حالیت آتے مون آتخسا شجرکاری کن خصوصی وڑوڈول اس کاریم اٹ اتنگانے۔ داوڑوڈول انا رداٹ نیال خلنگ کن کھدائی زیات کڑمب کننگک وخت اس کہ بنائی اِراسال اٹی نیال ءِ دُواٹ دیر تننگک اوکان پد خصوصی وڑوڈول انا رداٹ خلوک آ نیال تا روتہ غاک کڑمب آن ڈغارآن دیر ءِ جذب کننگ نا قابل مریک۔
