اسلام آباد۔ 30مئی (اے پی پی) بنجائی وزیر خزانہ ومحصولات شوکت ترین پارینے کہ جامع وپائیدار ودکی نا چرجوئی ساڑی حکومت نا اولیت آتے ٹی اوار ءِ، پاکستان اولیکو وار 10تُواٹی 4 ٹریلین روپئی آن زیات نا ریونیو دوئی کننگ اٹ سرسہبی دوئی کرے، 1960نا دہائی آن پد اولیکو وار اسہ حکومت اس زرگزران کن جامع وپائیدار روڈمیپ اس شین تسنے، بروک آ مالی سال اٹی 5800ارب روپئی نا محصولات جمع کننگ نا کوشست کننگک، خصوصی اقتصادی زون تے ٹی 1.5 درسد ٹرن اوور خراج نا اطلاق مفک، کشت وکشار، صنعت، ویلیو ایڈڈ شعبہ وآئی ٹی ءِ آسراتی تننگک، گردشی وام تے پدریسہ چٹفنگک۔ یک شنبے نادے آ انسٹی ٹیوٹ فار پالیسی ریفارمز آن لائن نا کنڈآن پوسکن آ مالی سال انا بجٹ نا بابت ویبینار آن تران کرسا وزیر خزانہ پارے کہ تدوک آحکومت نا ایسری آ پاکستان نا حسابات جاریہ نا نسخان 20 ارب ڈالر نا خڑک ئس، روپئی زیات القدر ئس، برآمدآک کم انگا کہول آ ئسر، ملک ءِ بھلو مالیاتی نسخان ا س مون تروک ئس، زرمبادلہ نا کوڑی اسٹ آن ہلیس یک و نیم تُو انا درآمدآتے کن کافی ئسر، گردشی وامک آسمان ءِ سرمسوسرو اوٹی پدریسہ ودکی مسکہ، داپس منظر اٹ پوسکن آ حکومت واکداری تے سنبھالا، سنگت ملک آک پاکستان تون کمک کریر ولے او گرج آتا رداٹ الورہ، داوڑاٹ پاکستان آئی ایم تون رجوع کرے۔ وزیرخزانہ پارے کہ پاکستان مستین اٹ ہم آئی ایم ایف تون پروگرام کرے ولے جہانی حالیت آتا رداٹ داوخت آ نرم شڑت آتیا پاکستان ءِ مالیاتی کمک فراوان کننگا، داوار پاکستان مشکل حالیت و شڑت آتا رداٹ آئی ایم ایف تون پروگرام اس ہلک، اوپارے کہ ہراتم شرح سود 13.2درسد مرے و خور انا افراط زر 7 درسد مرے تو داوڑاٹ ویل ودی مریک، داوخت آ کوویڈ۔ 19 نا دین حالیت آتے پین مشکل جوڑ کرے و داڑآن بڑھوتری نا عمل زہمی مس۔ وزیرخزانہ پارے کہ وزیراعظم عمران خان نا کماشی ٹی حکومت کوویڈ۔ 19 آن زہمی زرگزران نا بحالی وودکی کن 1240ارب روپئی آن زیات نامالیاتی پیکج اس تس، داپیکج نا رداٹ دین انا دے تیٹی انسانی زند و روزگار ءِ بچفنگ اٹ توازن ءِ برقرارتخنگا، احساس پروگرام نا رداٹ راج انا زرگزرانی وڑاٹ نزور تپہ غاتے نغد امداد تننگا۔ چنکا ونیامی درجہ ناکاروبار ءِ کیش انا ویل آن بچفنگ کن گام گیج کننگا، وزیراعظم عمران خان تعمیرات نا صنعت کن خصوصی پیکج اس تس، داصنعت آن درزن ایلو صنعت وشعبہ غاک گنڈوک ءُ، داپیکج نانتیجہ ٹی ملک انا زرگزرانی سرجزآتے ٹی ترندی بس۔وزیرخزانہ پارے کہ حکومت نا گام گیج آن زرگزران بحال مننگ ءِ۔ بھلا صنعت آتا پیدوار اٹی 9 درسد ودکی مسنے، ننا برآمد آک ودنگ ءُ، خذمت نا بشخ شون ہلنگ ءِ، سمندرپارپاکستانی تا ترسیلات زراٹی ریکارڈ ودکی مسنے، ہاؤسنگ و تعمیرات نا بشخ اٹی ودکی مننگ ءِ، محصولات یکجا کننگ اٹ نمان ودکی مسنے و پاکستان اولیکو وار 10تُواٹی 4 ٹریلین روپئی آن زیات ناریونیو دوئی کننگ اٹ سرسہبی دوئی کرینے، ہند اٹک آتا بنداو آ ودیکی نا شرح ہدف آن زیات مسنے۔
