اسلام آباد۔ 23مارچ (اے پی پی) بنجائی وزیر پورٹ و شپنگ و نیشنل پارٹی نا صدر سینیٹر میر حاصل خان بزنجو پارینے کہ ننا غٹ انا راجی زمواری ئِ کہ ملک آن دہشت گردی و انتہاپسندی نا چٹفنگ کن کڑد ادا کین۔ انتہاپسند عنصر آک ملک اٹی مذہبی خار تالان کننگ خوارہ۔ او پنچ شنبے نا دے نیشنل پارٹی نا ورکرز کنونشن آن تران کریکہ۔ داوخت آ نیشنل پارٹی نا عہدیدار و جتا یونین آتا نمائندہ غاک ہم ساڑی ئسر۔ بنجائی وزیر پارے کہ سیاست و جماعت اسہ زمانہ اسے ٹی اسٹ ئسر۔ سیاسی ورکرز جماعت نا ہراول دستہ مسکہ ، بدقسمتی اٹ دا ملک انا سیاست اٹی سیاسی ورکرز و جماعت آتا رشتہ نزور مرسا کرے و اونا جاگہ ئِ جاگیر دار و زرکارآک ہلکر۔ اوپارے کہ پاکستان اٹی گیشتر جماعت آتا لیڈر شپ نا اونا ورکرز آتون رابطہ ختم مسنے ولے نیشنل پارٹی نا نظریہ ئِ کہ او ورکرز آتے اوار درسا کارہ۔ اوپارے کہ ننا غٹ انا راجی زمواری ئِ کہ ملک آن دہشت گردی و انتہاپسندی نا چٹفنگ کن کڑد ادا کین۔ اوپارے کہ سیاست ہموبندغئِ کروئی مرے ہرا نیزگار نا ویل آتے پہہ مرے۔ اوپارے کہ نیزگاری و بے روزگاری نا چٹفنگ نیشنل پارٹی نا بنداوی زمواری ئِ۔ اوپارے کہ 5 اپریل آ مزور یونین آتون اوفتا ویل آتا یکجہتی نا درشانی کن نن برانز اٹی شرکت کینہ۔ داکان مست نیشنل پارٹی اسلام آباد نا گچین کاریک مسر ہراٹی احمد لطیف پارٹی نا بے مقابلہ صدر، اظہر محمود نائب صدر ، عبداللہ دھائیوجنرل سیکرٹری، طاہر سیال ڈپٹی جنرل سیکرٹری، فریدہ ملک فنانس سیکرٹری ، سفیر احمد انفارمیشن سیکرٹری ، فرحت فاطمہ لیبر سیکرٹری ، سلیم اختر رابطہ سیکرٹری، ممتاز احمد سیکرٹری زالبول امور، خلیق بلوچ سیکرٹری یوتھ انٹرپورٹ و ایلو عہدیدار آتا گچینی ئِ کننگا۔ بنجائی وزیر پورٹ و شپنگ و نیشنل پارٹی نا صدر میر حاصل بزنجو غٹ عہدیدار آتیان سوغند ہلک۔ دود اٹی ریلوے مزور یونین و اتفاق ٹیکسی یونین نیشنل پارٹی اسلام آباد اٹی اوار مننگ نا پڑو ئِ کرے۔
