کوئٹہ۔ 23 مارچ (اے پی پی) وزیراعلیٰ بلوچستان نواب ثناءاللہ زہری پارینے کہ مملکت خداداد پاکستان مسلمانان پاک و ہند انا مریس جہد و بے شمار قربانی تیٹی وجود اٹی بسنے 23مارچ یوم قرارداد پاکستان نا بابت تینا کلہو اٹی وزیراعلیٰ پارے کہ 23مارچ 1940 ءآ لاہور اٹی مروک آ تاریخی اجتماع ٹی قرارداد پاکستان پیش کرسا دراصل پاکستان نا بنداو ئِ تخنگا و اوکان پد 7 سال انا گونڈ ئُ وخت اسے ٹی بانی پاکستان قائد اعظم محمد علی جناح نا سروکی ٹی پاکستان نا پن اٹ اسہ پوسکن ئُ اسلامی ریاست اس دنیا نا نقشہ غا پیش تما ہراکہ برصغیر نا سیاسی تاریخ نا اسہ اہم ئُ سنگ میل اس جوڑ مس۔ اوپارے کہ قیام پاکستان آن پد تعمیر پاکستان نا سفر اٹی ملک انا معاشی واقتصادی تعمیر نو و جمہوریت نا قیام کن داوخت انا سروک پدریسہ جہد آن پد ملک ئِ شونداری نا کسرآنئے بیرہ روان کریر بلکن آخبت نا لائحہ عمل اس ہم مرتب کننگا۔ وزیراعلیٰ پارے کہ وزیراعظم محمد نواز شریف نا مدبرانہ سروکی ٹی پاکستان نا جوڑ جاڑ و اودے ایشیانا معاشی ٹائیگر و بلوچستان ئِ پاکستان نا ٹائیگر جوڑ کننگ کن اسہ صفائُ روڈ میپ اس مرتب کرسا داڑآ سرگرمی اٹ عملدرآمد نا بناءمسنے و پاکستان ئِ اسہ شون ہلوک ملک اس جوڑ کننگ نا بناءبلوچستان آن کنگانے ہراٹی سی پیک نا رداٹ کیہی اسٹ میگاڈٹ آتیا ترندی اٹ عملدرآمد کننگ انگ ئِ ہرافتیان نئے بیرہ بلوچستان بلکن مچ آ پاکستان نا الس مستفید مریک۔ وزیراعلیٰ پارے کہ ساڑی آ دوراٹی جہانی برادری ٹی ملک اسے نا حیثیت نا تعین اٹی بنداوی ڈھانچہ نا جوڑ جاڑ ، دوئی وسیلہ غاتیان پبی فائدہ ، توانائی نا وسیلہ غاتا شونداری و ملکی پیداوار اٹی ودکی کن افرادی واک انا تربیت بنداوی اہمیت تخک و دا غٹ بشخ آتیٹی ساڑی حکومت وزیراعظم محمد نواز شریف نا سروکی ٹی نئے بیرہ عملی گام گیج نا بناءکرینے بلکن دانا نتیجہ غاک ہم صفا وڑاٹ مون آ بننگ نا بناءمسنے و بھاز زوت پاکستان اقتصادی و معاشی شونداری نا بابت ایشین ٹائیگر نا درجہ دوئی کیک و بلوچستان شونداری نا دا عمل اٹی بطور پاکستان نا ٹائیگر نا وڑاٹ مون آ بریک۔ وزیراعلیٰ پارے کہ ننا اکابر آک پاکستان نا قیام اٹی بے پناہ قربانی تسر وخت اس کہ ملک ئِ مون تروک دہشت گردی نا چیلنج آتون مون تننگ کن پاک فوج، ایف سی، پولیس تون اوار اوار شاری تا قربانیک ہم بے مثال ئُ و دا قربانی تا نتیجہ ٹی نن اسہ آجو و پرامن فضاءٹی دم ہلنگ اُن۔ اینو نا دے ننے عہد کروئی مریک کہ نن دا قربانی تے گم مننگ کن ہلیپنہ و تینا وطن عزیز نا جغرافیائی و نظریاتی سیم تا دفاع، ملک انا جوڑ جاڑ و شونداری کن ہروڑنا قربانی ایتنہ۔ وزیراعلیٰ دعا کرے کہ اللہ تعالیٰ ننا ملک انا حفاظت ئِ کے و ننے غٹ ئِ امن و سوگوی و قومی شونداری نا عمل اٹی تینا تینا کڑد ئِ ادا کننگ نا توفیق عطاءکے۔
