اسلام آباد۔ 23مارچ (اے پی پی) صدر مملکت ممنون حسین پارینے کہ پاکستان نا قیام اسہ جمہوری جہد اسے ٹی عمل اٹی بس، اونا بقاءو شونداری ہم جمہوریت ہی تون وابستہ ئِ، کنے یخین ئِ کہ پارلیمنٹ ، الس و غٹ ادارہ غاک دا مسخت کن ہم آہنگی تون کاریم کیرہ، قوم اسہ جمہوری نظام اسے نا رداٹ مون تروک چندی چیلنج آتون مون تننگ نا جہد کننگ ئِ ، جوزہ ءحب الوطنی ، خلوص ، عزم و ایمانداری آ مبنی ننا اجتماعی کوشست آک ملک ئِ شونداری نا پوسکن آمزل نا کنڈآ روان کننگ اٹی کمکار مریرہ۔ اوداہیت ئِ یوم پاکستان نا وخت آ تینا کلہو اٹی پارے ہرا اینو (پنچ شنبے ) نا دے آ اڈتننگ انگ ئِ۔ صدر یوم پاکستان نا خوشی نا وخت آ مچ آ قوم ئِ مبارکباد پیش کرسا پارے کہ دا دے ہرسال ننے برصغیر نامسلمان تا ہمو نظریہ ، اصول ، ارفع مسخت و سیوت نا یات ترفک ہرافتا سوب او تینا تغ انا پوروی اٹی سرسہب مسر۔ اوپارے کہ 77 سال مست اینو نا ہی دے برصغیر نا مسلمانک تینا تہذیب ، روایت و دودوربیدہ ہی اقدار نا رداٹ زند ئِ تدیفنگ کن اسہ جتائُ وطن اسے نا دوئی نا غیر متزلزل عزم انا درشانی ئِ کریر۔ صدر قوم آ زورشاغا کہ او دا پکا عزم انا اعادہ ئِ کیر کہ نن بانیان پاکستان نا نقش قدم آ چلینگسا اونا میرات یعنی پاکستان ئِ اونا تغ تا رداٹ امن ، شونداری و سوگوی نا جاگہ اس جوڑ کینہ۔
