اسلام آباد۔ 23مارچ (اے پی پی) وزیراعظم محمد نواز شریف پاکستان ئِ قائد اعظم نا افکار نا روشنی ٹی پوسکن آ دور انا شونداری کروک ریاست اس جوڑ کننگ نا عزم انا درشانی ئِ کرسا پارینے کہ بحیثیت قوم ننا زمواری ئِ کہ اسہ ہندن ئُ راج اس جوڑ کین ہراٹی رنگ و نسل یا مذہب و فرقہ نا بنداو آ ہچ گہس تون امتیازی سلوک روا تخنگپ۔ ننے اواری اٹ پاکستان ئِ اسہ ہندن ئُ قومی ریاست اس جوڑ کروئی ئِ ہراٹی غٹ شاری تے بریبری حق دوئی مرے و پاکستان نا ہر ڈیہہ شونداری کے۔ اینو نا جمہوری پاکستان اٹی عدلیہ و میڈیا آجوئِ ، ملک انا پسماندہ علاقہ غاتے اولیتی بنداو تیا شونداری تننگ انگ ئِ۔ شونداری نا سفر جوش وجوزہ اتون برجاءسلک۔ اوداہیت ئِ یوم پاکستان نا وخت آ تینا کلہو اٹی پارے ہرا (اینو) پنچ شنبے نا دے اڈ تننگ انگ ئِ۔ وزیراعظم پارے کہ 23مارچ ننا ملی تاریخ نا اسہ ناقابل فراموش ئُ دے اسے، سویلی ایشیا نا مسلم ملت اسہ وخت اسے آن تینا شناخت کن کوشاں ئسر ولے اوفتا مون آ ہچ ئُ متعین مزل اس ہلوکہ، ہنداتاریخ آ ننے ہمو یکسوئی دوبس ہراٹی نئے بیرہ مزل نا تعین مس بلکن قیام پاکستان نا دروشم اٹ نن او مزل ئِ دوئی ہم کرین۔ اوپارے کہ علامہ اقبال نا خطبہ الٰہ آباد اٹی دُ ن تو مزل نا تعین ئِ کننگاسس ولے داڑآ قومی اجماع 23 مارچ آ اڈ ہلک۔ دا دے ننے یات ترفک کہ اگہ عزم صمیم مرے و قوم ئِ اسہ یکسو و دیانت دار سروک اس دوبرے تو بظاہر ناممکن نشان تروک آ ہدف ممکن جوڑ مریک۔ وزیراعظم پارے کہ پاکستان نا قیام ہراڑے سویلی ایشیا ٹی پائیدار امن نا ضمانت ئس ہموڑے داخلقت کن اومیت نا روشنائی ئس ہرافتے متحدہ ہندوستان اٹی شونداری نا بریبری وارخواہی آن محروم تخنگا و اوفتا تہذیبی تشخص ئِ ختم کننگ نا کوشست کننگا۔ پاکستان نا دروشم اٹی اسہ قوم اس تینا ہمو پہچان ئِ دوئی کرے ہرا گیشتری نا دوتے اٹ معرض خطر ئس۔ وزیراعظم پارے کہ 23مارچ نا قرارداد پاکستان اٹی دامضمر ئس کہ دا پوسکن آ مملکت تینا قیام آن پد اسہ ہندن ئُ قومی ریاست اسے ٹی شاغنگاکہ ہراٹی غٹ شاری تے بریبری وارخواہی دوبرے۔ اوپارے کہ اینو اللہ نا شکر ئِ کہ پاکستان نا الس ئِ اسہ وار ولدا تینا گم مروک آ مزل نا سراغ ملانے۔ اوپارے کہ گدرینگوک آ مسہ سال اٹی ہراڑے پاکستان ئِ امن نا جاگہ اس جوڑ کننگ کن حکومت، فوج، سلامتی نا ادارہ و الس قربانی تس ہموڑے اقتصادی شونہالی و شونداری کن حکومت پورو یکسوئی اتون پیش رفت کرے۔ وزیراعظم نواز شریف پارے کہ اینو نا پاکستان اللہ نا فضل و کرم اٹ جمہوری ئِ۔ داٹی عدلیہ آجوئِ۔ میڈیا آجوئِ ۔ ملک انا پسماندہ علاقہ غاتے اولیتی بنداو تیا شونداری تننگ انگ ئِ۔ سی پیک کون آ تاریخ ساز ڈٹ آتیا کاریم برجائِ ہراڑآن بلوچستان نا جوڑ جاڑ و شونداری نا عمل نا بناءمسنے، بروک آ دے تیٹی انشاءاللہ بلوچستان ملک انا شون ہلوک علاقہ غاتیٹی اوار مریک۔ وزیراعظم پارے کہ دا حسن اتفاق ئِ کہ 23مارچ آ مسلم لیگ نا پلیٹ فارم آن ملت اسلامیہ ئِ تینا مزل نا سراغ ملا و اینو مسلم لیگ ہی نا سروکی ٹی نن دا مزل ئِ بازیافت کرین۔ اودعا کرے کہ اللہ تعالیٰ پاکستان ئِ سلامت کے و اودے آخبت نا عظیم شونداری ہلوک مملکت اس جوڑ کے۔
