اسلام آباد۔ 22مارچ (اے پی پی) وزیراعظم محمد نواز شریف پارینے کہ ساڑی حکومت بجلی نا کاختی ئِ بنداوی اقتصادی چیلنج سرپند کرسا ملک انا صنعتی ، واپاری و اُرائی گرج آتے پورو کننگ کن بجلی نا بشخ ئِ اولیت تسنے، پاکستان دیر ، دے انا روشنائی و تہوتون اوار چندی وسیلہ غاتیان بجلی ودی کننگ نا بھلو قدرتی لائخی اسے آن مالامال ئِ ۔ اوداہیت ئِ اسٹیٹ پاور انوسٹمنٹ کارپوریشن چائنہ نا چیئرمین وانگ بیانگ ہوا تون چارشنبے نا دے وزیراعظم ہاﺅس اٹی ہیت وگپ کرسا پارے۔ وزیراعظم چیئرمین ئِ بلوچستان اٹی کولا آن چلینگوک آ 1320 میگاواٹ بجلی نا ڈٹ انا بنداو آ مبارکبادی تس ہرا حبکو و حکومت بلوچستان نا ہندی شریدار آتون اوفتا کمپنی نا اسیجائی ڈٹ ئِ۔ وزیراعظم پارے کہ اونا حکومت معیشت ئِ سرسہبی اتون پائیدار اقتصادی نمو نا کسر آ روان کرینے ہرانا اعتراف ئِ دنیا نا متبر مالیاتی ادارہ غاک کرینو۔ وزیراعظم پارے کہ پاکستان نا معیشت چندی چیلنج آتا باوجود بلند شرح نمو دوئی کرینے۔ معیشت نا بحالی ، توانائی نا تنکی نا مون ئِ توننگ و سیکورٹی نا حالیت آتے گچین جوڑ کننگ نا ننا ایجنڈا نا مثبت نتیجہ دوئی مسنے۔ وزیراعظم پارے کہ پاکستان بھاز بھلو صارف مارکیٹ اسے تون ایشیا نا اہم واپاری، توانائی و ٹرانسپورٹ کوریڈور نا حیثیت اٹ تینا اسٹریٹجک محل و وقوع تون درملکی زرکار آتے کن ساز گار کاروباری چاگڑد اس فراوان کیک۔ اوپارے کہ پاک۔ چین اقتصادی راہداری نئے بیرہ علاقائی رابطہ بلکن علاقائی اقتصادی کمک نا کنڈآ سفر کن اہم ئُ ڈٹ اسے۔ اوڑدہی ٹی بنجائی وزیر دیر و بجلی خواجہ محمد آصف، وزیر ڈٹ بندی و شونداری احسن اقبال و ایلو سینئر کمامدارآک ہم ساڑی ئسر۔
