فاٹا نا ہر ایجنسی ٹی فاٹااصلاحات نا رداٹ شونداری ڈٹ آتا بنائِ کننگک
اسلام آباد۔ 22مارچ (اے پی پی) بنجائی وزیر ریاستیں و سیمی علاقہ جات عبدالقادر بلوچ پارینے کہ فاٹا نا ہر ایجنسی ٹی بروک آ دہ سال اٹی فاٹا اصلاحات نا رداٹ شونداری ڈٹ آتا بنائِ کننگ انگ ئِ، فاٹا نا طالب علم آتے میڈیکل کالج و غٹ یونیورسٹی تیٹی تعلیم حاصل کننگ نا آسراتی دستیاب ئِ۔ چارشنبے نادے قومی اسمبلی ٹی وقفہ سوج آتیٹی شگفتہ جمانی نا سوج انا ورندی ٹی بنجائی وزیر ریاستیں و سیمی علاقہ جات عبدالقادر بلوچ پارے کہ داٹی ہچ ئُ شک اس اف کہ فاٹا ہفت ایجنسی تیا تالان ئِ۔ ہر ایجنسی ٹی بروک آ دہ سال اٹی فاٹا اصلاحات نا رداٹ شونداری ڈٹ آتا بناءئِ کننگک۔ فاٹانا ہفت ایجنسی تا طالب علم آتے میڈیکل کالج و ملک انا غٹ یونیورسٹی تیٹی تعلیم حاصل کننگ نا آسراتی ساڑی ئِ۔ داکان بیدس خیبر ایجنسی نا یونیورسٹی و ڈی آئی خان نا یونیورسٹی ٹی فاٹا نا طالب علم آک تعلیم حاصل کننگ ئُ۔ بنجائی وزیر پارے کہ فاٹا اصلاحات نا رداٹ فاٹا ٹی زیات آن زیات یونیورسٹی و میڈیکل کالج جوڑ کننگک۔ اوپارے کہ فاٹا ٹی کشت وکشار نا سرجز اف، آخبت اٹی کشت وکشار نا گچینی کن پنجاب اتون اواری اٹ گچین آن گچین کشاری مہارت و چندی فصل آتا معیاری بج انا کمک اٹ کشت وکشار نا بشخ اٹی گچینی اتنگک۔ اسہ ضمنی سوج اسے نا ورندی ٹی اوپارے کہ صوبہ ٹی اسہ سسٹم اس مریک۔ گورنر صوبہ نا چیف ایگزیکٹو مریک۔ فاٹا اصلاحات نا کمک اٹ ملوک آ شونداری فنڈ و شونداری ڈٹ آتا گورنر چاروکی ئِ کیک۔ شیر اکبر خان نا اسہ پین ضمنی سوج اسے نا ورندی ٹی بنجائی وزیر پارے کہ فاٹا نا ہر ایجنسی ٹی فاٹا اصلاحات نا کمک اٹ کیڈٹ کالج جوڑ کننگک وخت اس کہ فاٹا نا طالب علم آتے کن مچ آ ملک اٹی چندی یونیورسٹی تیٹی داخلہ نا کوٹہ ئِ دوگناکننگانے۔
