حکومت فاٹا اصلاحات نا رداٹ فاٹا کن 110 ارب روپئی نا بھلو زراس جتا کرینے
اسلا م آباد۔ 22مارچ (اے پی پی) ریاست و سیمی امور نا بنجائی وزیر عبدالقادر بلوچ پارینے کہ فاٹا ٹی شونداری ڈٹ و فنڈ آتا مانیٹرنگ کن فاٹا نا باسک قومی اسمبلی و سینیٹر آتیا مبنی کمیٹی اس جوڑ کننگانے ہرا چندی شونداری ڈٹ آتا چاروکی ئِ کیک۔ چارشنبے نادے قومی اسمبلی ٹی وقفہ سوج آتیٹی نفیسہ عنایت خٹک نا سوج انا ورندی ٹی بنجائی وزیر ریاست و سیمی امور عبدالقادر بلوچ پارے کہ فاٹا اصلاحات نا رداٹ فاٹا ئِ چندی شونداری ڈٹ آتے کن بروک آ دہ سال اٹی سالانہ 110 ارب روپئی تننگک۔ شونداری ڈٹ و فنڈ آتا مانیٹرنگ کن فاٹا نا باسک قومی اسمبلی و سینیٹر آتیا مبنی کمیٹی اس جوڑ کننگانے ہرا چندی شونداری ڈٹ آتا چاروکی ئِ کیک۔ اوپارے کہ داکان مست فاٹا ئِ سالانہ 20 ارب روپئی شونداری ڈٹ آتے کن تننگاکہ ولے فاٹا اصلاحات نا رداٹ حکومت اینخو سال آن فاٹا کن 110 ارب روپئی نا بھلو زر اس جتا کرینے۔ قیصر جمال نا ضمنی سوج انا ورندی ٹی او پارے کہ قطبی وزیرستان نا 8 ہزار ہند آتے نسخان رسینگ نا احوال رسینگانے۔ نسخان زدہ ہند آتا کساس ئِ خلنگ کن سروے ٹیمک اُرااُراغا ہنسا سروے کننگ اٹی اختہ ئُ ولے داوخت اسکان 2370 ہند آتا سروے ئِ پورو کننگانے۔ آپریشن اٹی زہمی مروک آ عارضی وڑاٹ بے اُرا بندغ آتے پورو وڑاٹ بھس مروک آ اُرانا معاوضہ چار لکھ روپئی تننگ انگ ئِ وخت اس کہ جزوی وڑاٹ زہمی مروک آ اُرانا معاوضہ اسہ لکھ 60 ہزار روپئی تننگ انگ ئِ۔ بنجائی وزیر پارے کہ آپریشن آن زہمی علاقہ غاتیٹی اسہ وڑاٹ عارضی وڑاٹ بے اُرا بندغ آتے معاوضہ بشخ وپانٹ کننگ انگ ئِ ولے اسہ علاقہ اسے ٹی دہ لکھ روپئی معاوضہ نا ادائیگی نا ہیت درست اف۔
