پاکستان ئِ ڈیجیٹل ملک اس جوڑ کننگ نا ڈٹ انا اسہ بشخ اس انفارمیشن ٹیکنالوجی پارک انا اڈ تننگ ئِ، صوبائی دارالحکومت آتیٹی ہم آئی ٹی پارک اڈ تننگک، وزیر مملکت انفارمیشن ٹیکنالوجی انوشہ رحمان
اسلام آباد۔ 21مارچ(اے پی پی) وزیرخزانہ سینیٹر اسحاق ڈار پارینے کہ وزیراعظم محمد نواز شریف نا سروکی ٹی مسلم لیگ (ن) نا حکومت پاکستان ئِ ڈیجیٹل و معاشی وڑاٹ خودکفیل ملک اس جوڑ کننگ خوائک، ڈیجیٹل پاکستان وخت انا اہم ئُ گرج اسے، سافٹ ویئر پارک انا اڈتننگ آن انفارمیشن ٹیکنالوجی نا بشخ ئِ شونداری تننگ اٹی کمک رسینگک۔ سے شنبے نا دے اسلام آباد اٹی انفارمیشن ٹیکنالوجی پارک انا اڈتننگ نا بابت کوریا نا ایکسپورٹ امپورٹ بینک(ایگزم) و حکومت پاکستان نا نیام اٹ اکنامک ڈویلپمنٹ ئِ آپریشن فریم ورک (ای ڈی سی ایف) نا رداٹ کڑز انا فراوانی نا معاہدہ غا دستخط کننگ نا دود انا وخت آ ذرائع ابلاغ تون ہیت وگپ کرسا اوپارے کہ سافٹ ویئر پارک انا اڈتننگ آن انفارمیشن ٹیکنالوجی نا بشخ انا شونداری ٹی کمک رسینگک۔ اوپارے کہ مسلم لیگ ن نا حکومت تینا گدرینگوک آ دور اٹی السی آسراتی تا بابت السی بنجااڈ تس وخت اس کہ ٹیکنالوجی نا بشخ اٹی شونداری کن خصوصی گام گیج کننگا۔ اوپارے کہ کوریا پاکستان نا سنگت ملک ئِ ہرا بنجائی دارالحکومت اٹی انفارمیشن ٹیکنالوجی پارک اکن 76.3ملین ڈالر نا کڑز فراوان کیک، ڈٹ آ جم خڑچ انا تخمینہ 88.383ملین ڈالرنا خڑک ئِ اوپارے کہ پارک انا اڈتننگ نا مسخت انفارمیشن ٹیکنالوجی نا بشخ انا مون آ دننگ ئِ انتئے کہ ڈیجیٹل پاکستان وخت انا اہم ئُ گرج اسے ۔ وزیر خزانہ کڑز انا فراوانی نا بابت کوریا نا حکومت، پاکستان اٹی تعینات کوریا نا سفیرو ایگزم بینک اتون اوار کوریا نا الس نا منت واری ئِ ادا کرے۔ اوپارے کہ کوریا پاکستان اٹی راجی و اقتصادی شونداری نا چندی ڈٹ آتے کن مالی کمک فراوان کننگ ئِ بروک آ وخت آتیٹی پاک کوریا تین پہ تینی رابطہ غاک پین سوگو مریرہ اوپارے کہ کوریا پاکستان اٹی اسلام آباد آن لاہور ایم ٹو موٹروے نا ڈٹ ئِ پورو کرے ہرا کوریا نا پاکستان اٹی اولیکو بھلا میگاڈٹ ئس، دا ڈٹ انا پوروی آن پاکستان و کوریا نا ہڑتوم آ کنڈآتا رابطہ و تین پہ تینی کمکاری ٹی ہرتدوک آ دے اتون پین ودکی و سوگوی ودی مننگ ئِ۔ داوخت آ انفارمیشن ٹیکنالوجی نا وزیر مملکت انوشہ رحمان پارے کہ اسلام آباد اٹی آئی ٹی پارک انا اڈتننگ نا بابت کوریا تون معاہدہ غا دستخط نا انتظار ئس۔ اوبنجائی دارالحکومت اٹی آئی ٹی پارک انا اڈتننگ نا بابت مچ آ قوم ئِ مبارکبادی تس۔ اوپارے کہ وزیراعظم محمد نواز شریف نا سروکی ٹی مسلم لیگ (ن) نا ہر دور حکومت اٹی السی شرحالی و راجی و اقتصادی شونداری نا چندی ڈٹ آتے پورو کننگا۔ وزیر مملکت پارے کہ جہانی کہول آ ٹیکنالوجی نا دنیا ٹی ہر تدوک آ دے اتون جدت ودی مننگ ئِ و وزیراعظم محمد نواز شریف حکومت ئِ سنبھالنگ تون ہی پاریسس کہ پاکستان ئِ ڈیجیٹل ملک اس جوڑ کننگ کن گام گیج کننگے، وزیراعظم نا پارت آتے مون آ تخسا داچرجوئی ٹی کاریم برجائِ ۔ داوخت آ پاکستان سافٹ ویئر ایکسپورٹ بورڈ (پی ایس ڈی پی) و اقتصادی امور ڈویژن تون اوار کوریا نا سفارتخانہ و ایگزم بینک کوریا نا بڑزکوکمامدارآک ہم ساڑی ئسر۔
