برطانیہ نا کاروباری بندغ وزرکارآتے کن پاکستان اٹی بھلو وارخواہی اس ارے
اسلام آباد۔ 21مارچ (اے پی پی) وزیراعظم محمد نواز شریف تون برطانوی وزیر داخلہ امبر رڈ سے شنبے نا دے داڑے وزیراعظم ہاﺅ س اٹی اوڑدہی کرے۔ وزیراعظم محمد نواز شریف برطانوی سیکرٹری داخلہ نا خیرمقدم ئِ کرسا برطانوی وزیراعظم تھریسامے تون ستمبر 2016ءٹی اقوام متحدہ نا جنرل اسمبلی نا دیوان نا وخت آ نیویارک اٹی مروک آ تینا جوڑ جاڑی اوڑدہی نا ذکرئِ کرے۔ اوپارے کہ پاکستان و برطانیہ نا تعلقداریک اسیجائی تاریخ و الس نا نیام اٹ سوگو رابطہ غاتا بنداوآٹی ئُ و پاکستان و برطانیہ نا نیام اٹ واپار ، زرکاری، امن و سلامتی و شونداری کن کمکاری نا چرجوئی ٹی خڑکی اشتراک کار ئِ۔ اوپارے کہ گہرہ ادارہ جاتی ہڑتوم آ کنڈآتا کمک اٹ پاکستان و برطانیہ نا تعلقداری تا سوگوی نا عکاسی مریک۔ اوپارے کہ بھلو کچ اسے ٹی برطانیہ ٹی رہینگوک پاکستانی پاکستان و برطانیہ نا نیام اٹ تعلقداری تے سوگو جوڑ کننگ کن بھاز کمکار ئُ۔ اوپارے کہ نن برطانیہ تون ساڑی تعلقداری خاص کر واپار و زرکاری نا بشخ آتیٹی کمکاری ئِ پین مون آ دننگ نا خواہندار اُن۔ وزیراعظم پارے کہ پاکستان 20 کروڑ خلقت نا سوگو مارکیٹئِ ہراڑے متوسط تپہ مون آ بننگ ئِ و برطانیہ نا کاروباری بندغ و زرکارآتے کن پاکستان اٹی بھلو وارخواہی اس ساڑی ارے۔ اوپارے کہ پاکستان برطانیہ نا ادارہ جہانی شونداری (ڈی ایف آئی ڈی ) نا کاریم نا ستائِ کیک۔ اوپارے کہ پاکستان اوغان تا سروکی ٹی اوغان تا تینا امن و بحالی نا عمل نا مخ تفی و داچرجوئی ٹی آسراتی فراوان کننگ نا عزم کرینے۔ نن علاقائی امن و سوگوی کن غٹ کوشست آتا مخ تفی ئِ برجاتخنہ۔ برطانوی سیکرٹری داخلہ امبررڈ شاندار خیرمقدم آ وزیراعظم نا منت واری ئِ ادا کرے وپارے کہ علاقائی امن کن کروک آ کوشست آتا چرجوئی ٹی برطانیہ تینا ہر وڑکمک فراوان کیک۔
