اسلام آباد۔20مار چ( اے پی پی) آپ ءُ لینءِ بنجاھی وزیر خواجہ محمد آصف ءَ گشتگ کہ کشن گنگا پاورپراجیکٹ ءِ سرءَ ثالثی آمید گس پاکستانءِ ھقءَ پیسلہ ءِ سرءَ عمل درآمد کنگ بہ بیت۔ سندھ طاس منءُ گر ءِ ردءَ پاکستان ءُ بھارت ءِ درنیامءَ کمیشنءِ تک ءَ سول ءُ تران ءَ را وش اَتک کن اَنت۔ اے سول ءُ تران نہ تنا پاکستان بلکیں خطہ ءِ ھاترءَ پاھدگ اِنت۔ بھارتءِ گوما آپی جیڑھ ءِ ھوالگءَ میاں اوستمانی بینک ءِ گوما سئے روچی سول ءُ تران 11اپریل ءَ چہ بندات بیت ۔ اے ھیالانی درشانی آئیءَ دوشمبےءِ روچءَ پریس کانفرنسءَ کنانءَ کتگ۔ آئیءَ گشتگ کہ حکومت پاکستان ءِ کوشستاں چہ سندھ طاس من ءُ گر ءِ سرءَ گپءُ تران ءِ عمل پدا بندات بوتگ۔ اے سول ءُ تران2015 ءَ چہ اوشت ءِ آماچ بوتگ، وھدے کہ پاکستانءِ نیمگءَ چہ کشن گنگا ءُ رتلے پاورپراجیکٹ ءِ سرءَ کمیشن ءِ تکءَ سول ءُ ترانءَ را ناکام لیک اِتگءُ ثالثی ءِ نیمگءَ رؤھگءِ کلوھ داتگ۔ خواجہ محمد آصف ءَ گشتگ کہ 14ءُ 15جولائی 2016ءَ پاکستان ءِ سیکریٹری آپ ءُ لین ءِ بھارتی ھم کار ءَ گوں نیودہلی ءَ بوتگیں سولءُ ترانءَ پد پاکستان ءَ اے دوھیں جیڑھ آنی سرءَ ثالثی ءِ کشک وتی کتگ۔ آئی ءَ گشتگ کہ کشن گنگا پاورپراجیکٹ کہ ایشی ءَ را دریائے نیلم ءِ سرءَ جوڑ کنگ بوھگءَ اِنت ءُ ایشیءِ سرءَ ثالثی آمید ءَ پاکستانءِ ھق وتی پیسلہ داتگ کہ ایشی ءِ سرءَ پاکستان عمل درآمد کنگءِ لوٹ ءَ کنگءَ اِنت۔ آئی ءَ گشتگ کہ رتلے پاورپراجیکٹ انوں بنداتی بھر ءِ تہا اِنت ءُ ایشیءِ ڈیزائن ءِ سرءَ ھم پاکستان سک تکانسراِنت۔
