اسلام آباد۔20مارچ( اے پی پی ) ڈائریکٹر جنرل شماریات محمد بشیر جنجوعہ ءَ گشتگ کہ مردم شماری ءِ اولی بھر دھ روچءِ تہا سرجم کنگ بیت۔ ریڈیو پاکستان ءَ گوں گپءُ تران کنانءَ آئی ءَ گشتگ کہ خانہ مردم شماری ءِ عمل ساپ ءُ سلہی ءَ گوں جاری اِنت، اولی بھر ءِ تہاخانہ شماری ءِ کار سرجم کنگ بوتگ ءُ مردم شماری ءِ کار آؤکیں دھ روچانی تہا سرجم کنگ بنت۔ آئی ءَ گشتگ کہ مردم شماری ءِ عمل ءِ تہا مے مردم ھساب کنوک پاک فوج ءِ اہلکار آنی سروکی ءَ کاگداں پُر کنگ ءَ اَنت۔ ڈائریکٹر جنرل شماریات ءَ گشتگ کہ دراھیں انتظامات پہ وشی ءِ گوما گوازگءَ اَنت ءُ مردمانی گلّاءُ شکایت مے کنٹرول رومءِ وسیلگءَ چہ وھدءِ سرءَ دور کنگ بوھگءَ اَنت۔ بشیر جنجوعہ ءَ گشتگ کہ مردم شماری ءِ عمل ءِ جُست سک ارزان اَنت ءُ مردم آھانی پسہ آں ارزانیءِ گوما دات کن اَنت۔ یک جُستے ءِ پسودیئانءَ آئیءَ گشتگ کہ شہری دمگاں مردم دمک ءِ نیمگءَ محکمہ شماریاتءِ نمائدگءِ نیمگءَ چہ لوگانی سرءَ نشان جنگ ءِ ءُ دومی نیمگءَ نشان نہ جنگ ءِ سرءَ پریشان بوھگءَ اَنت چیاکہ باز دمکانی یک نیمگےءَ یک حلقہ ءُ دومی نیمگءَ دومی حلقہ ءَ مردم شماری بوھگءَ اِنت بلے کوچگّی دمگاں اے وڑیں ھچ جیڑھ ءُ جنجال ءِ دیمپانی کنگ نہ بوھگءَ اِنت۔
