اسلام آباد۔ 18 مارچ (اے پی پی) وزیراعظم عمران خان پارینے کہ پوسکن آ پاکستان درحقیقت پوسکن آ سوچ انا پن ءِ، تعمیراتی بشخ اٹی نموآن زرگزران کورونا دین کون آ دین اٹی ہم بچنگا، دابشخ انا سوب آن زرگزران اٹی گچینی، روزگار اٹی ودکی و دولت نا فراوانی مریک ہراڑآن ملک آ ودوک آ وام تا پدی تننگ اٹ کمک رسینگک۔ داخیال آتا درشانیءِ او پنچ شنبے نادے آ خواری کش تپہ ٹی اُرا و فلیٹ بشخنگ نا دود آن تران کرسا کرے۔ وزیراعظم پارے کہ او ذلفی بخاری و ورکرویلفیئر فنڈ انا ٹیم ءِ خراج تحسین پیش کیک کہ 25 سال متکن آ ڈٹ ءِ حقیقت اٹ بدل کریر۔ دابھلوسرسہبی اسے۔ 25سال آن دادے تینا اولیت کننگ کن ہچ کس سجفتو۔ دافک دا سجفتورہ ہم کہ اوفتا تینا اُرامریک انتئے کہ دااسہ حکومت اسےنا ہم اولیت الوکہ۔ وزیراعظم پارے کہ پوسکن آ پاکستان درحقیقت پوسکن آ سوچ انا پن ءِ۔ پوسکن آ پاکستان نا مسخت نزور تپہ غاتے بڑز اتنگ ءِ۔ داننا غٹ انا زمواری ءِ ۔ اوپارے کہ حکومت نا سوچ دا پک کیک کہ دا کس اسے آ احسان اس اف۔ دا خواری کش آتا حق ءِ۔ دااُراک مہالو کِراغا ملارہ داسہ ہموکِرا قسط اٹ کاہک و دا اُرااوفتاملکیت مریک۔ وزیراعظم پارے کہ تینا اُراغٹ آن بھلو نعمت اس سمجھنگک۔ خلقی آ علاقہ غاتیٹی ڈغار کم نہاد آ دوئی مننگ نا سوب آن ہموڑے اُراجوڑ کننگ آسان مریک ولے شار تیٹی مزور تپہ، تنخواہ دار، سرکاری ملازم و پولیس ملازم آتیکن تینا اُرا جوڑ کننگ ڈغار کبین مننگ نا سوب آن ناممکن مریک۔ اوپارے کہ نن بینک آتیان مارگیج نا پوسکن ءُ کانود اس ایسونن ہراڑآن بینک اولیکو وار دا تپہءِ اُراتننگ کیک۔ داکانود ءِ جوڑ کننگ و عدالت آن موکل ہلنگ اٹ 2سال لگا، تاخیر نا سوب ہندا ئس۔ وزیراعظم اسٹیٹ بینک انا گورنر رضاباقر ءِ دا وخت آ تاکید کرے کہ بینک آک دا وام تیکن 380 ارب روپئی تخانو۔ لس بندغ کن دافتا دوئی کننگ ءِ آسان کننگے۔ وزیراعظم پارے کہ حکومت نا کنڈآن داٹی 3 لکھ روپئی نا سبسڈی اُرا و فلیٹ آہم تننگ انگ ءِ۔ 20 سال اکن سود انا کچءِ 5 درسد آ منجمد کننگانے۔ ملک اٹی سود انا کچ اخس کہ ودے داوام تیا سوچ انا کچ ودپک۔ وزیراعظم پارےکہ 1500 فلیٹ خواری کش آتے داوخت آ وخت اس کہ بروک آ ریسہ ٹی پین 1500 فلیٹ تننگک۔ داکان بیدس مچ آ پاکستان اٹی پوسکن آ ہاؤسنگ ڈٹ بناکرینے۔ اوپارے کہ ہاؤسنگ نا آسراتی نا ہرجاگہ غا کمتی ءِ۔ دانا بھاز خواست ءِ۔ ہموتپہ ہراڑتون اُراہلنگ یا جوڑ کننگ کن پیسہ متوکہ داڑکن دا ڈٹ انا بناءِ کننگانے۔ وزیراعظم پارے کہ ہندن ہندن حکومت نا کٹیا ٹی ودکی مریک دا بشخ اٹی پین پیسہ خلینہ۔ وزیراعظم پارے کہ دنیا ٹی اسہ حکومت اس ہم مفت اُرا بشخپک۔ داڑکن نن آسانی ودی کننگ اُن۔ اوپارے کہ تعمیراتی بشخ اکن اولیکو وار حکومت آسانی ودی کرینے۔ ہرہفتہ داڑکن جاچ دیوان اس مریک۔ اوپارے کہ کورونا دین مچ آ دنیا نا زرگزران ءِ نسخان تس۔ پاکستان نا بچنگ نا سوب ہندابشخ ءِ۔ اوپارے کہ ملک اٹی سرمٹ، سریا نا نہاد آتیٹی ودکی نا مطلب ءِ کہ تعمیراتی بشخ چلینگ انگ ءِ۔ مچ آ ملک اٹی ترندی اٹ تعمیراتی بشخ اٹ کاریم مننگ ءِ۔ وزیراعظم پارے کہ داڑآن ملک اٹی روزگار اٹی ودکی مریک۔ ملک انا دولت اٹی ودکی مریک ہراڑآن ملکی وام تا زرتس اٹی کمک رسینگک۔ اوپارے کہ تعمیراتی بشخ تنیا ملکی زرگزران ءِ شون تننگ کیک۔ داوخت آ وزیراعظم نیال اس ہم خلک۔
