اسلام آباد۔ 18مارچ (اے پی پی) وزیراعظم عمران خان پنچ شنبے نادے آ اسلام آباد اٹی پوسکن آ پاکستان ہاؤسنگ پروگرام نا رداٹ خواری کش تپہ غاتیٹی اُرا و فلیٹ الاٹ کننگ نا دود اٹی بطور مہمان خاص بشخ ہلیک۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ دا ڈٹ ءِ ورکرز ویلفیئر فنڈ، وزارت سمندر پارپاکستانیز و ہیومن ریسورس ڈویلپمنٹ ایسر اسکان سرکرینو۔ دا ڈٹ انا اولیکو ریسہ ٹی 1،008فلیٹ و 500 اُرا اوار ءُ ہرا مالکانہ حق آ خواری کش تپہ غاتے الاٹ کننگک۔ دافتے ٹی صنعت آتیٹی کاریم کروک آ نیزگار خواری کش، مزور آتا جنوزان و خصوصی بندغ آک اوار ءُ۔ وزیراعظم تفوک آ فلیٹ و اُراتا جاچ ءِ ہلیک و مزور آتا جنوزان و خصوصی بندغ آتیٹی مالکانہ حق انا سرٹیفکیٹ بشخک۔ خصوصی کمکار سید ذوالفقارعباس بخاری وزیراعظم ءِ حوال ایتک۔
