اسلام آباد۔ 18 مارچ (اے پی پی)اسپیکر قومی اسمبلی اسد قیصر پارینے کہ کشمیر پاکستان نا شہ رگ ءِ، پاکستان نا الس کشمیری الس نا دڑد ءِ تینا دڑد تکک، کشمیری الس آ کروک آ بھارت نا است ہسون ظلم انا مچ آ دنیا مذمت ءِ کیک۔ بھارت نا فاشٹ نظریہ غا کاربند مودی سرکار کشمیر تون اوار مچ آ بھارت اٹی اقلیت آتیا زند ءِتنک کرینے۔ داخیال آتا درشانی ءِ او آزاد کشمیر نا مسکوہی وزیراعظم و پاکستان تحریک انصاف آزاد کشمیر نا صدر بیرسٹر سلطان محمود چوہدری تون گپ وتران کرسا کرے۔ ہرا پنچ شنبے نادے آ داڑے اوڑتون اوڑدہی کرے۔ اوڑدہی ٹی ملک انا جم سیاسی، زرگزرانی و سلامتی نا حالیت آتیا گپ وتران کننگا۔ اسپیکر قومی اسمبلی پارے کہ کشمیر پاکستان نا شہ رگ ءِ کشمیری الس نا دڑد ءِ پاکستانی الس تینا دڑد تکک۔ بھارت نا کشمیری الس آ کروک آ است ہسون ظلم انا مچ آ دنیا مذمت ءِ کیک۔ بھارت نافاشٹ نظریہ غا کاربند مودی سرکار کشمیر تون اوار مچ آ بھارت اٹی اقلیت آتیا زند ءِ تنک کرینے۔ اوپارے کہ بھارت نا کنڈآن مقبوضہ کشمیر اٹی انسانی حق انا بھلا خلاف ورزی تیان مچ آ دنیا معلومدار ءِ۔ جہانی برادری مقبوضہ کشمیر اٹی بھارتی حکومت ناکنڈآن کروک آ ظلم آتا نوٹس ءِ ہلے۔ پاکستان کشمیری الس نا سیاسی، سفارتی و اخلاقی مخ تفی ءِ برجاتخک۔ اوپارے کہ وزیراعظم عمران خان جنرل اسمبلی ٹی کشمیر نا مقدمہ ءِ جوان وڑاٹ پیش کرینے۔ ساڑی پارلیمنٹ کشمیر نا ویل ءِ غٹ علاقائی و جہانی فورم تیا پبی وڑاٹ تالان کرینے۔ ساڑی حکومت پاکستان، زرگزرانی و اقتصادی تنکی تا مون ءِ توننگ اٹ سرسہب مسنے۔ اسد قیصر پارے کہ ملک انا زرگزرانی ٹک آک گچینی نا کنڈآ ہِننگ ءُ۔ اوڑدہی ٹی بیرسٹر سلطان محمود چوہدری اسپیکر قومی اسمبلی نا کشمیری الس تون مہرومریبت نا جوزہ نا ستاءِ کرسا پارے کہ بھارت چم آتے اٹ کشمیری الس نا بدل مفروک جوزہ آجوئی ءِ توننگ کپک۔ کشمیر برصغر نا تقسیم نا بے پورو ایجنڈا ءِ دادے ایسر کننگ آن بیدس ڈیہہ ٹی امن مننگ کپک۔ اوپارے کہ وزیراعظم عمران خان نا جنرل اسمبلی نا تقریر کشمیر نا ویل ءِ پوسکن ءُ ساہ اس شاغانے۔ کشمیری الس نا توڷ و بش پاکستان تون ءِ و او اولیکو دے آن پاکستان ءِ تینا سفیر منرہ۔ بروک آ گچین کاری تیان پد تحریک انصاف کشمیر اٹی بھلو گیشتری اسے اٹ حکومت جوڑ کیک۔ سلطان محمود چوہدری پارے کہ کشمیری الس پاکستان تحریک انصاف تون گہری نظریاتی وابستگی تخرہ۔ بھارت ءِ امنا کروئی تمک کہ کشمیر بیرہ کشمیری تا ءِ۔
