اوٹاوہ۔ 18 مارچ (اے پی پی) کینیڈ اٹی پاکستان نا ہائی کمشنر رضابشیر تارڑ پارینے کہ مساعد حالیت آتیان پد ہم سکھ برادری کن کرتارپور کوریڈور ءِ تفنگ و ہموڑے سکھ زائر آتیکن آسراتی فراوان کننگ نا مسخت داخیرخواہی جوزہ و امن کن است خواہی نا درشانی ءِ ہرانا رداٹ وزیراعظم عمران خان نا حکومت اسہ چنکو وخت اسے ٹی کرتارپور کوریڈور ءِ تفے ہرانا مچ آ دنیا خاص کر سکھ برادری نا کنڈآن پبی وڑاٹ ستاءِ کننگانے۔ اوداخیال آتا درشانی ءِ ’’پاکستان اٹ سیل و سوات نا وارخواہی‘‘ نا سرحال آ اڈ ہلوک آ اسہ ویبی نار اسے آن تران کرسا کرے ہرانا بست وبندءِ پاکستان ہائی کمیشن اوٹاوا، کینیڈا و پاکستانی قونصلیٹ ٹورنٹو ئسک اسیجائی وڑاٹ کریر۔ ویبی نار نا نظامت ءِ قونصل جنرل پاکستان ٹورنٹو عبدالحمید کرےوخت اس کہ ایلو بشخ ہلوک آتیٹی پنجاب گورنر نا سیل و سوات نا کوآرڈی نیٹر فاروق ارشد، پاکستان ٹورزم ڈویلپمنٹ کارپوریشن نا منیجر پبلسٹی و پروموشن ملک بابر جاوید، حکومت خیبرپختونخوا نا ڈائریکٹر آرکیالوجی و میوزمزڈاکٹر عبدالصمد، گندھاراریسورس سنٹر پاکستان نا سلاہکار ڈاکٹر ندیم عمر تارڑ، پاکستان سکھ گردوارہ پربندھک کمیٹی نا صدر ستونت سنگھ، سیل و سوات نا چاہندار جسبیر سنگھ بھوپاری و کینیڈا ٹی پاکستانی سیل و سوات نا بابت سرگرم حمیراخان شامی ئسک اوار ئسر ہرافک پاکستان اٹی سیل وسوات نامون آ دننگ نا بابت چندی سلاہ و سلاہ و سوج پیش کریر۔ویبی نار آن تران کرسا رضابشیر تارڑ پارے کہ حکومت پاکستان سیل و سوات نا مون آ دننگ کن ہروڑنا کوشست کننگ ءِ و دابابت وزیراعظم پاکستان نا کماشی و وزیرخارجہ مخدوم شاہ محمود قریشی نا پارت آ مچ آ دنیا ٹی پاکستانی سفارتخانہ و مشنز پاکستان نا سافٹ امیج ءِ تالان کننگ و پاکستان اٹ سیل و سوات نا وارخواہی تے تالان کننگ کن کوشست کننگ اٹی ءُ۔ اوپارے کہ مستین اٹ پاکستان اٹی سیکورٹی آن بیدس جہانی پریس نا اسہ کنڈی و منفی کوریج نا سوب آن جہانی سیل و سوات مون آ ہِننگ کتو ولے داسہ منہ سال آن حالیت آک پورو بدل مسنو وپاکستان ہرلحاظ اٹ سیل و سوات نا بابت اسہ رکھ ءُ ملک اس جوڑ مسنے۔ سیکورٹی نا گچین حالیت آتا سوب آن اقوام متحدہ ہم اسہ وخت اسے آن اسلام آباد ءِ فیملی اسٹیشن گوندانے۔ تینا تران اٹی رضابشیر تارڑ پارے کہ منہ وخت مست اسکان پاکستان سیل و سوات نا بابت مچ آ دنیا کن اسہ سربستہ ءُ راز اس ئس ہرادے سوشل میڈیا و وی لاگز پورو وڑاٹ پاش کرینوو داسہ مچ آ دنیا ٹی پاکستان ءِ سیل و سوات نا بابت اسہ اہم ءُ جاگہ سے نا وڑاٹ ہُننگ انگ ءِ۔ اوپارے کہ پاکستان متکن آ تہذیب آتا یات گار و وارث مننگ آن بیدس فلک بوس مش، سرسوز دامان، جھیل و ریگزار آتا گل زمین ءِ ہراڑے سیل و سواتی تیکن است خواہی نا بے پناہ گمان و وارخواہی ساڑی ءِ۔ اوپارے کہ سیل و سوات نا مون آ دننگ کن نجی بشخ انا ہم کڑد المی ءِ انتئے کہ نجی بشخ انا شریدار و خاص وڑاٹ سیل و سوات نا بابت ٹورآپریٹرز و دلچسپ وشفاف ٹورسٹ پیکج آتا دوئی مننگ آن بیدس بھلو کچ اسے ٹی سیل و سواتی تا متوجہ کننگ مشکل مریک۔ رضابشیر تارڑ ویبی نار نا بشخ ہلوک آتا پاکستان اٹی سیل و سوات نا مون آ دننگ کن پیش کروک سلاہ و سوج خاص وڑاٹ میڈیکل ٹورزم و گندھارا ڈپلومیسی ءِ مون آ دننگ، بدھ خانقاہ تے آباد کننگ و پاکستان ڈویلپمنٹ کارپوریشن نا ویب سائٹ ءِ ہم یوزر فرینڈلی کننگ نا سلاہ تا ستاءِ کرے۔ و بشخ ہلوک آتا سلاہ و سوج و سلاہ تے اسہ جامع دروشم اسے ٹی پاکستان اٹی سیل و سوات نا مون آ دننگ کن سرگرم ادارہ غاتسکان سرکننگ نا عزم انا درشانی ءِ کرے۔
