اسلام آباد۔ 17 مارچ (اے پی پی) وزیراعظم عمران خان اسلام آباد سیکورٹی ڈائیلاگ و 100 آن زیات تھنک ٹینکس و یونیورسٹی تے پالیسی سازی نا عمل اٹ شریک کننگ کن قومی سلامتی ڈویژن نا ایڈوائزری پورٹل نا بناءِ کرے۔ چارشنبے نادے آ داڑے اسلام آباد سیکورٹی ڈائیلاگ نا بنائی سیشن آن تران کرسا وزیراعظم پارے کہ پاکستان اقتصادی شونہالی و السی راجی آسراتی نا قومی وژن آ عمل کننگ ءِ۔ وزیراعظم پارے کہ سلامتی نا خواست ءِ کہ نن پاکستان نا لس شاری ءِ رکھ کین و اوفتے زند انا گرج آتے فراوان کننگے۔ بنائی سیشن اٹی وزیراعظم ءِ پوسکن آ جامع سیکورٹی فریم ورک انا بارواٹ پاننگا ہراکہ اقتصادی شونداری نا بنداو تون اوار اوار عسکری،زرگزرانی و انسانی سلامتی نا مسہ تمبہ غاتیا مبنی ءِ۔ اومستی پارے کہ پاکستان نا اقتصادی سلامتی نا اولیت رابطہ، ملکی و علاقائی امن و دنیا تون شونداری شریداری ءِ۔ وزیراعظم قومی سلامتی ڈویژن ءِ دافریم ورک نا ٹہیفنگ آ مبارکبادی تس۔ وزیراعظم دہشت گردی نا برخلاف جنگ اٹ بے مٹ کڑد ادا کننگ آ پاک فوج، انٹیلیجنس و سویلین کانود نافذ کروک آ ادارہ غاتا کوشست آتا ستاءِ کرے۔ اوپارے کہ اسہ حقی رکھ ملک ءِ پک کننگ کن ننے پاکستان نا لس شاری ءِ رکھ کروئی مریک۔ اومستی پارےکہ قومی سلامتی ٹی اینو بھازانگا پلوآک اوار ءُ ہرافتے تدوک آ عشرہ غاتیٹی گوجالسا کننگا دافتے ٹی موسمیاتی سیکورٹی، خور انا رکھ و اقتصادی شونہالی اوار ءِ۔ وزیراعظم عمران خان پارے کہ قومی وسیلہ غاتے ودفنگ و دا وسیلہ غاتے انسانی راجی آسراتی و سوگو دفاع کن کاریم اٹ اتنگ نا چرجوئی ٹی ڈالر نا پیشن ہِننگ آن زیات ڈالر ملک اٹ اتوئی مرے۔ اوپارے کہ نسخان آن روپئی نزور، کبینی ٹی ودکی و نیزگاری ودک۔ وزیراعظم پارے کہ حکومت کرنٹ اکاؤنٹ نسخان اٹی کمتی اتنگ، برآمد و براہ راست درملکی زرکاری ءِ ودفنگ کن گام گیج کرینے و اولیکو وار ساڑی حکومت جہانی کہول آ امنا مروک ٹین بلین ٹری سونامی تون اوار موسمیاتی سلامتی نا خصوصی آ عمل کننگ ءِ۔ اوپارے کہ بروک آ عشرہ غاتیٹی موسمیاتی بدلی پاکستان کن سنجیدہ ءُ ویل اس جوڑ مننگ کیک و ساڑی حکومت موسمیاتی بدلی نا اثرآتون مون تننگ کن مربوط کوشست کننگ ءِ۔ اوپارے کہ دا معاملہ ءِ جامع سلامتی فریم ورک اٹ خناٹ خوشی مس۔ وزیراعظم پارے کہ حکومت احساس و ہنکین پروگرام تا کمک اٹ السی راجی آسراتی ءِ پک کرینے و پاکستان نا تاریخ اٹ پورو شفافیت اٹ غٹ آن زیات نغد زر بشخنگانے۔ داڑتون اوار اوار حکومت کوویڈ۔ 19 دین اتون مون تننگ اٹ سرسہب مسنے و نیزگار تپہ غاتا رکھ ءِ پک کننگانے۔ دنیا ہم ننا سرسہبی تے امنا کیک۔ علاقائی سلامتی نا بابت وزیراعظم عمران خان پارے کہ ہمسایہ ٹی امن آن بیدس زرگزرانی شونہالی برقرار سلنگ کپک ہنداسوب ءِ کہ ڈیہہ ٹی امن اونا ویژن ءِ۔ وزیراعظم پارے کہ پاکستان ڈیہہ ٹی واپاری و راہداری مرکز مننگ نا لائخی تخک۔ اوپارے کہ بھارت اقوام متحدہ نا قرارداد آتا رداٹ کشمیری تے حق خودارادیت تننگ نا وعدہ ءِ پورو کے۔ اوپارے کہ او حکومت اٹ بننگ تون بھارت ءِ ہیت و گپ نا سلہ خلک ولے بدبختی اٹ 5 اگست 2019ء آ بھارت غیرکانودی گام گیج کرے۔ اوپارے کہ پاکستان و بھارت نا نیام اٹ کشمیر بنداوی جھیڑہ ءِ، اگہ کشمیری تے حق خودارادیت ترسا کشمیر نا ویل ءِ پرامن وڑاٹ ایسر کننگے تو اونا ہڑتوم آ ملک آتے فائدہ مریک۔ اوپارے کہ بھارتءِ اولیکو گام ءِ ہرفوئی مرے و مون آ ہِننگ کن سازگار چاگڑد اس ودی کروئی مرے۔ وزیراعظم پارے کہ پاکستان اوغانستان اٹی سیاسی ایسر نا خواہندار ءِ ہراپائیدار امن نا سوب مرے۔ اوپارے کہ اوغانستان اٹی امن ڈیہہ نا رابطہ نا لائخی تے ودفنگ کن المی ءِ۔ وزیراعظم نا خصوصی کمکار قومی سلامتی ڈویژن و اسٹریٹجک پالیسی پلاننگ ڈاکٹر معید یوسف پارے کہ ایڈوائزری پورٹل پالیسی سازی ءِ پین جامع جوڑ کننگ اٹ کمکار مریک و دانا کمک اٹ تھنک ٹینکس و یونیورسٹیک قومی سلامتی ڈویژن ءِ قومی سلامتی نا بابت براہ راست پالیسی سلاہ و سوج فراوان کننگ کیک۔ وزیراعظم پورٹل نا جوڑ کننگ آ قومی سلامتی ڈویژن ءِ مبارکبادی تس و اودے پالیسی سازی نا عمل اٹ اوار مننگ نا بابت حکومت نا عزم انا اسہ درور اس گوندا۔
