ٹریک اینڈ ٹریس سسٹم نافذ مننگ اسکان خراج دُزی ءِ توننگ مفک، وزیراعظم عمران خان نا کابینہ نا دیوان آن تران

اسلام آباد۔ 16 مارچ (اے پی پی) وزیراعظم عمران خان پارینے کہ ہراتم اسکان ٹریک اینڈ ٹریس سسٹم نافذ مفک خراج دُزی ءِ توننگ مفک، شوگر انڈسٹری، سرمٹ انڈسٹری، فرٹیلائزر انڈسٹری و سگریٹ انڈسٹری ٹی بھلو کچ اسے آ خراج دُزی مریک، 40 درسد سگریٹ بلیک اٹ بہاکننگک، بالواسطہ خراج آتا بھاریم الس ءِ ہرفوئی تمک۔ ٹریک اینڈ ٹریس سسٹم نا باندات آ سندھ ہائی کورٹ نا حکم امتناعی ءِ چٹفنگ کن گام گیج کرفنگے، الیکٹرانک ووٹنگ مشین ملک انا گچین کاری نظام ءِ شفاف جوڑ کننگ کن المی مسنے، الیکٹرانک ووٹنگ مشین و سمندر پار پاکستانی تے وونٹ انا حق تننگ نا باندات آ پیش رفت آن کابینہ نا ہردیوان اٹی معلومدار کننگے۔ داخیال آتا درشانی ءِ او سے شنبے نادے آ کابینہ دیوان آن تران کرسا کرے۔ وزیراعظم پارے کہ ایف بی آر بھلو کچ اسے آ خراج دُزی ءِ توننگ کن ٹریک اینڈ ٹریس سسٹم درستی راستی کرفنگ نا کوشست کننگ ءِ انتئے کہ شوگر انڈسٹری، سرمٹ انڈسٹری، فرٹیلائزر انڈسٹری و سگریٹ انڈسٹری ٹی بھلو کچ اسے آ خراج دُزی مریک۔ 40 درسد سگریٹ بلیک اٹ بہاکننگک، اوفتیا خراج تفننگک، داڑآن ملک ءِ ارب آ روپئی نا نسخان مریک، تدوک آ 15 سال آن ایف بی آر کوشست کننگ ءِ کہ ٹریک اینڈ ٹریس سسٹم اس درستی راستی کرفنگے و خراج نا نظام ءِ خودکار جوڑ کننگے ولے ہر وار داکوشست ءِ لتاڑنگک۔ اوپارے کہ ایف بی آر ننے باوری کرفیسس کہ یکم جون آن ٹریک اینڈ ٹریس سسٹم اس درستی راستی کرفنگک۔ داسہ سندھ ہائی کورٹ دا بابت حکم امتناعی جاری کرینے۔ کابینہ نا باسک آتے داہیت انا انداز ہ مرے کہ خودکار نظام مفننگ نا سوب آن ملک اٹی ہراوڑنا خراج دُزی مننگ ءِ و ملک اٹی آٹومیشن مننگ کن ہلپننگ انگ ءِ۔ ایف بی آر بیرہ شوگر انڈسٹری آ تدوک آ 5 سال اٹی 400 ارب روپئی نا خراج خلک۔ اگہ ٹریک و ٹریس سسٹم مسکہ تو داخہ خراج دُزی مننگ ہی کتوکہ۔ سگریٹ انڈسٹی ٹی 98 درسد بیرہ 2 کمپنی ایترہ، ایلو 40 درسد بہامروک آ سگریٹ آتیا خراج ہی تفننگک۔ہراتم اسکان ٹریک اینڈ ٹریس سسٹم نافذ مفک خراج دُزی ءِ توننگ مفک۔ اوپارے کہ واکدار بشخ آتا خراج دُزی توپننگ نا سوب آن بالواسطہ خراج عائد کروئی تمک ہراڑآن کبینی مریک و گڑاتا نہادآک ودرہ۔ اوپارے کہ سندھ ہائی کورٹ آن حکم امتناعی ءِ چٹفنگ کن گام گیج کننگے و عدالت ءِ پاننگے کہ دا کس انا جند انا باندات اف۔ ملک ءِ ارب روپئی نا نسخان مننگ ءِ و الس ءِ کبینی نا کمک اٹ اونا پیسہ تروئی تمک۔ اوپارے کہ الیکٹرانک ووٹنگ مشین اس درستی راستی کرفنگ نا باندات آ کابینیہ نا ہر دیوان اٹ پیش رفت آن معلومدار کننگے۔ الیکٹرانک ووٹنگ مشین ملک انا گچین کاری نظام ءِ شفاف کننگ کن المی مسنے۔ غٹ شور کیرہ کہ گچین کاریک سہی متنو۔ گچین کاری تے شفاف کننگ کن الیکٹرانک مشین اس درستی راستی کرفنگے۔ الیکٹرانک ووٹنگ مشین و سمندر پار پاکستانی تے وونٹ انا حق تننگ نا بابت کابینہ نا ہردیوان اٹ پیش رفت آن معلومدار کننگے۔