اسلام آباد۔ 15 مارچ (اے پی پی) نیشنل کمانڈ اینڈ آپریشن سینٹر (این سی او سی) کورونا دین انا مثبت کیس آتا ودنگ آ گڑتی نا درشانی ءِ کرینے۔ دوشنبے ناسہب اتون این سی اوسی نا دیوان اس مس۔ سیشن اٹ صوبہ غاتا غٹ چیف سیکرٹریک ویڈیو لنک انا کمک اٹ بشخ ہلکر۔ سیشن اٹ ودوک آ کورونا کیس آتیا گڑتی نادرشانی ءِ کننگا۔ دیوانءِ پاننگاکہ ہسپتال آتیٹی داخل آتیٹی ہم ودکی مننگ ءِ۔ ملک اٹی مروک آ کورونا دین انا کل مرک آتا کچ آن 55 درسد نا تعلق پنجاب آن ءِ۔ داوخت آ دادین انا توننگ کن صوبہ غاتا کنڈآن کروک آ گام گیج آتا ستاءِ کننگا۔ صوبائی انتظامیہ ءِ پارت کننگانے کہ ایس او پی تا خلاف ورزی کروک آتا برخلاف سخت انتظامی کارروائی کننگے۔ ایس او پیو این پی آئی تیا عملدرآمد کپروک آتا برخلاف بھلو کچ اسے آ بریک ڈاؤن کننگے۔ گلگت بلتستان، اے جے کے و ایلو سیل و سواتی ہند آتیا ہنوک آ سیل و سواتی تیان خواست کننگک کہ او ایس او پی تیا عملدرآمدءِ پک کیر۔ صوبہ غاتیان خواست کننگاکہ او داہیت ءِ پک کیر کہ ٹرانسپورٹ/ہوٹل پین پین اٹی ایس او پی تیا سختی اٹ عملدرآمد کننگے، ایلودروشم اٹ سخت گام گیج کننگک و داٹی سیل و سوات نا بشخ ءِ بند کننگ آہم سجفنگ مریک۔ الس آن خواست کننگاکہ او بزرگ شاری تے ویکسین خلیفر انتئے کہ بزرگ شاری تا مرک آتا کچ زیات ءِ۔
