کولمبو۔ 24 فروری (اے پی پی) وزیراعظم عمران خان پارینے کہ کرکٹ و سیاست نا پِڑاٹ اول اٹ اودے زیات سرسہبی دوئی متو ولے او حوصلہ ءِ الیتو و جہدءِ برجاتخا، ہرا چیلنج آتون مون تننگ نا لائخی تخپک او چیمپین جوڑ مننگ کپک، گوازی ننے ہندا رغامک کہ نن ہمت ءِ ہلیپن و جہد ءِ برجاتخن۔ داخیال آتا درشانی ءِ او چارشنبے نادے آ داڑے سری لنکن وزیرگوازی و امور نوجوانان نامل راجاپکسے نا کنڈآن تینا شرف اٹ اڈہلوک آ دود آن مہمان خاص نا حیثیت اٹ تران کرسا کرے ہراٹی سری لنکا نا پارلیمنٹ نا اسپیکر و سری لنکا نا اسپورٹس کمیونٹی آن تعلق تخوک آ بندغ آک بشخ ہلکر۔ وزیراعظم عمران خان پارے کہ گوازی تا سرجزآک ننے ہموفتے رغامک ہرافتےاسکول آتیٹی نصابی تعلیم نا کمک اٹ ہرافتے رغامپننگک، دا ننے چندی چیلنج آتون عہدہ برمننگ، مقابلہ کننگ و جہد نا سبخ ایتک۔ اوپارے کہ داالمی اف کہ غٹ آن قابل گوازی گرہی چیمپیئن مرے بلکن اصل گوازی گر ہمو مریک ہرا بے سہبی و باتننگ آن ہیل کرسا مون آ کاہک و حوصلہ ءِ ہلیپک، ہرادے شکست تون مون تننگ بفک او چیمپیئن مننگ کپک۔
