کولمبو۔ 24 فروری (اے پی پی ) وزیراعظم عمران خان نا شرف اٹ سری لنکا نا پارلیمنٹ نا اسپیکر مہندایاپاابے وردانا و سری لنکا نا وزیر گوازی وامور نوجوانان نمل راجہ پاکسانہ اس سُوارہ اس تسر۔ وزیراعظم عمران خان ءِ سپورٹس مین نا حیثیت اٹ خراج تحسین پیش کننگ کن دود اس اڈتننگا ہراٹی سری لنکا نا وزیر آک، پارلیمان نا باسک آک و گوازی گرآک بشخ ہلکر۔ وزیراعظم عمران خان ءِ وزیر گوازی نا کنڈآن بڑزکو آب انا سپورٹس کمپلیکس نا سلاہ ہم پیش کننگا ہراوزیراعظم عمران خان نا پن آ جوڑ کننگک۔ دود اٹ وزیراعظم عمران خان نا کرکٹ کیریئر نا بابت دستاویزی فلم اس ہم نشان تننگا ہراٹی وزیراعظم عمران خان نا کرکٹ نا زمانہ نا سری لنکن گوازی گر تا کنڈآن اودے خراج تحسین ہم پیش کننگا۔ وزیراعظم عمران خان تینا شرف اٹ اڈ تروک آ دا دود انا منتظمین آتا منت واری ءِ ہرفے و اسپورٹس مین نا حیثیت اٹ تینا یاد آتا ذکر ءِ کرے۔ اوبشخ ہلوک آتے پارے کہ ہراوڑ کرکٹ نا کمک اٹ او مقابلہ کننگ ءِ ہیل کرے و تینا ہندا لائخی تا سوب آن او اسہ سیاسی جماعت اسے نا کماشی ءِ کننگ و پاکستان نا وزیراعظم مننگ نا قابل مس۔ وزیراعظم یونیورسٹی گریجویٹ نا حیثیت اٹ تینا سری لنکا نا دورہ نا ہم ذکر ءِ کرے۔ اوپاکستان اٹ مروک آ میچ اٹ سری لنکا نا ورلڈ کپ اٹ سرسہبی نا ذکر ءِ کرسا اودے قابل گمر گوندا و ٹیم کیپٹن ارجنارانا ٹنگا تون اوار ٹیم انا گوازی گر تے خراج تحسین پیش کرے۔ سری لنکا وزیر گوازی و امور نوجوانان وزیراعظم عمران خان ءِ یات گاری نشان اس پیش کرے۔ وزیراعظم عمران خان ہم اودے تینا دستخط مروک بیٹ انا ٹیکی اس تس۔
