اسلام آباد۔ 24 فروری (اے پی پی) وزارت خزانہ پارینے کہ بنجائی حکومت نا غٹ سرکاری ملازم(سول و سلہہ بند فوج) انا تنخواہ تیا نظرثانی کن پے اینڈ پنشن کمیشن ءِ بروک آ بجٹ آن مست تینا سلاہ و سوج تننگ نا پارت کننگانے۔ تخفیف تفاوت الاؤنس پے اینڈ پنشن کمیشن نا حتمی سلاہ و سوج بننگ اسکان عبوری بنداو تیا تننگانے۔ داڑے جاری بیان اٹ وزارت خزانہ نا ترجمان پریس نا گڑاس بشخ آتیٹی شینک آرٹیکل نا بابت وضاحت کرسا پارے کہ بنجائی کابینہ بنجائی حکومت نا بریبر تنخواہ یا بنداوی تنخواہ نا بریبر و اوڑآن 100 درسد زیات کارکڑد الاؤنس ہلپروک آ گریڈ اسٹ آن ہلیس گریڈ 19 اسکان نا ملازم آتیکن یکم مارچ 2021 آن 2017نا بنداوی اسکیل نا بنداو آ 25 درسد تخفیف تفاوت الاؤنس نا منظوری ءِ تسوسس۔ ترجمان پارے کہ بنجائی حکومت نا کیہی ادارہ و محکمہ غاک ہندن ءُ ہراڑے مہالو 100 درسد یا بنداوی تنخواہ نا بریبر یا داڑآن 100 درسد آن زیات ودکی الاؤنس نا موکل تننگانے۔ ترجمان پارے کہ تخفیف تفاوت الاؤنس نا مسخت 100 درسد ودکی الاؤنس یا بنداوی تنخواہ ہلنگ و ہلپروک ملازم آتا نیام اٹ پرخ انا چٹفنگ ءِ۔ اوپارے کہ کل 6 لکھ، 23 ہزار، 215 سرکاری ملازم آتیان اِرا لکھ 96 ہزار 470 ملازم ہندن ءُ ہرافک وخت اس ہم 100درسد یا بنداوی تنخواہ نا بریبر یا داڑآن 100 درسد آن زیات ودکی الاؤنس ہلتنو ۔ دا الاؤنس پے اینڈ پنشن کمیشن نا حتمی سلاہ و سوج بننگ اسکان عبوری بنداو تیا تننگانے۔ ترجمان پارے کہ بنجائی حکومت نا غٹ سرکاری ملازم (سول و سلہہ بند فوج) انا تنخواہ تیانظرثانی کن پے اینڈ پنشن کمیشن ءِ بروک آ بجٹ آن مست تینا سلاہ و سوج تننگ نا پارت کننگانے۔ ترجمان پارے کہ پے اینڈ پنشن کمیشن ءِ ساڑی نظام نا جاچ ءِ ہلنگ و دابابت سلاہ و سوج مرتب کننگ کن ہم پاننگانے۔
