پاکستان وسری لنکا ہڑتوم آ کنڈآتا واپار، چندی بشخ، علاقائی سلامتی و دہشت گردی نا برخلاف جنگ اٹ ہڑتوم آ کنڈآتا کمکاری آ امنا کرینو، وزیر خارجہ شاہ محمود قریشی

اسلام آباد۔ 24 فروری (اے پی پی) پاکستان و سری لنکا ہڑتوم آ کنڈآتا واپار، زرکاری، جان جوڑی، تعلیم، کشت وکشار، سائنس و ٹیکنالوجی تون اوار انسانی وسیلہ غاتا شونداری، علاقائی سلامتی، دہشت گردی نا برخلاف جنگ اٹ ہڑتوم آ کنڈآتا کمکاری ءِ مون آ دننگ آ امنا کرینو۔ وزیر خارجہ شاہ محمود قریشی چارشنبے نادے آ کولمبو ٹی تینا سری لنکن ہم منصب ڈائنش گنا وردنا تون اوڑدہی کرے۔ دااوڑدہی ٹی مروک آ گپ وتران اٹ ہڑتوم آ کنڈآتا تعلقداری، چندی بشخ آتیٹی ہڑتوم آ کنڈآتا کمکاری نا مون آ دننگ و تین پہ تینی است خواہی نا اہم علاقائی و جہانی باندات آ گپ وتران کننگا۔ شاہ محمود قریشی پارے کہ پاکستان و سری لنکا نا نیام اٹ، تدوک آ کیہی دہائی تیا محیط، ہڑتوم آ کنڈآتا تعلقداری ءِ۔ وزیر اعظم عمران خان نا ساڑی آ دورہ داہیت ءِ پک کیک کہ پاکستان، سری لنکا تون ہڑتوم آ کنڈآتا تعلقداری تے پین ودفنگ نا خواہندار ءِ۔ وزیراعظم عمران خان و سری لنکن وزیراعظم ماہنداراجاپکاسا نا اسیجائی کماشی ٹی ’’واپار و زرکاری کانفرنس‘‘ نا اڈتننگ ستاکڑزوک ءُ گام اسے ہرا ہڑتوم آ ملک آتا نیام اٹ ہڑتوم آ کنڈآتا واپاری تعلقداری ءِ مون آ دننگ اٹ کلیدی کڑد ادا کیک۔ وزیر خارجہ پارے کہ پاکستان و سری لنکا نا نیام اٹ ہڑتوم آ کنڈآتا واپار نا کچ ءِ ودفنگ کن آجوواپاری معاہدہ (ایف ٹی اے) ءِ ودفنگ نا گرج ءِ۔ ڈیہہ ٹی زرگزرانی رابطہ غاتا مون آ دننگ کن بیلٹ اینڈ روڈ گام گیج نا رداٹ’’پاک چین اقتصادی راہداری ڈٹ ، مرکزی اہمیت اس تخک زرگزرانی سرجز آتا مون آدننگ کن مچ آ ڈیہہ داڈٹ آن فائدہ ہرفنگ کیک۔ گوادر پورٹ و سری لنکن پورٹ انا نیام اٹ رابطہ غاتا مون آ دننگ، نیامی ایشیائی، کاروباری ہند آتسکان آسان رسینگ دوئی کننگ اٹ کمکار مننگ کیک۔ شاہ محمود قریشی پارے کہ علاقائی رابطہ غاتا مون آ دننگ کن سارک فورم ءِ پین فعال کننگ نا گرج ءِ۔ ہڑتوم آ وزیر خارجہ غاک اقوام متحدہ و سارک اتون اوار اہم علاقائی و جہانی فورم تیا تین پہ تینی کمکاری نا عزم انا درشانی ءِ کریر۔ شاہ محمود قریشی پارے کہ ہڑتوم آ ملک آتا نیام اٹ تہذیبی و دودوربیدگی تعلق نا اہمیت ءِ مون آ تخسا ’’مذہبی سیل و سوات‘‘ ءِ مون آ دننگ نا گرج ءِ۔ ہڑتوم آ وزیر خارجہ غاک پاکستان و سری لنکا نا نیام اٹ ہڑتوم آ کنڈآتا واپار، زرکاری، جان جوڑی، تعلیم، کشت وکشار، سائنس و ٹیکنالوجی تون اوار تین پہ تینی است خواہی نا بشخ آتیٹی ہڑتوم آ کنڈآتا کمکاری ءِ ودفنگ کن اسیجائی کوشست آتے برجاتخنگ و انسانی وسیلہ غاتا شونداری، علاقائی سلامتی، دہشت گردی نا برخلاف جنگ اٹ ہڑتوم آ کنڈآتا کمکاری ءِ مون آ دننگ آ امنا کریر۔ سیکرٹری خارجہ سہیل محمود و وزارت خارجہ نا ترجمان زاہد حفیظ ءسک ہم اوڑدہی ٹی ساڑی ئسر۔ اوڑدہی آن پد وزیر خارجہ ’’وزٹربک‘‘ اٹ تینا تاثر آتے نوشتہ کرے۔