اسلام آباد۔ 24 فروری (اے پی پی) بنجائی وزیر حوالکاری و شینکاری سینیٹر شبلی فراز پارینے کہ وزیراعظم عمران خان ملک اٹ جمہوریت نا سوگوی و وونٹ انا تقدس نا بحالی ءِ خواہک، فرسودہ خریدوفروخت نا روایت ءِ ماس آن کشوئی ءِ، ہندن ءُ باسک پارلیمنٹ اٹ برے ہرا ملک و الس نا گچینی کن کاریم کننگ کیر۔ سینیٹ گچین کاری و سیاست اٹ خریدوفروخت نا برخلاف وزیراعظم و حکومت چٹان آنبار سلوک ءُ۔ لس گچین کاری تیٹی الیکٹرانک وونٹنگ اس درستی راستی کرفنگ نا کوشست کننگ اُن۔ داہیت ءِ او چارشنبے نادے آ سپریم کورٹ نا پیشن میڈیا تون گپ وتران کرسا پارے۔ بنجائی وزیرحوالکاری و شینکاری پارے کہ ننا کوشست ءِ کہ ملک اٹ جمہوریت ءِ سوگو و الس ءِ شونہال کننگ کن ہندن ءُ بندغ پارلیمنٹ اٹ بریر ہرافک ملک و الس نا گچینی کن کاریم کننگ کیر نئے کہ او خاص مسخت کن پارلیمنٹ اٹ بریر و تینا خڑچ کروک آ پیسہ غاتے ہلسا پین پیسہ جوڑ کیر۔ اوپارے کہ سچ مدام غالب بریک، فیصلہ انشاء اللہ حق آ بریک۔ اوپارے کہ وزیراعظم عمران خان و اونا کارندہ غاک حق و سچ اتون تاریخ نا داکنڈآ سلوک ءُ وخت اس کہ ہراتہار واکدار تا نمائندگی ءِ کننگ ءُ اوفک تاریخ نا چپ کنڈآ سلوک ءُ و تاریخ اوفتیان ورندی بٹنگک۔ ننا است خواہی ءِ کہ ہرکہول آ گچین کاری تیٹی شفافیت مرے انتئے کہ ننا ملک اٹ ہراتم کہ گیچن کاریک مسر، اوفتیا اعتراض بس۔ اوپارے کہ حلقہ این اے 75 ڈسکہ نا 20 پولنگ اسٹیشن تیا دُوارہ گچین کاری کرفنگ نا چیلنجءِ عمران خان امنا کرے۔ اوپارے کہ دا ہموفک ءُ ہرا چار حلقہ ءِ ملنگ خواتورہ ہمووخت آ پی ٹی آئی غٹ لوازمات آتے پورو کرسا الیکشن کمیشن و عدالت آتون رجوع کرے و ولدا ا ضد آ سلنگ نا برخلاف ننا حق اٹ فیصلہ بس۔
