کولمبو۔23فروری (اے پی پی): مزن وزیر عمران خان ءَ سری لنکا ءِ ھمکار مہنداراجاپاکسے ءِ گوما ون ٹو ون گند ءُ نند کت ایشی ءِ اندر ءَ دو نیمگی ءُ دمگی ارزشت ءِ کار آنی سر ءَ ھیال ریچی کنگ بوت۔ مزن وزیر میڈیا کارگس ءِ نیمگ ءَ جاڑی بوتگیں بیان ءِ رد ءَ دوئیں سروک آں سری لنکا ءِ مزن وزیر ءِ کارگس ٹیمپل ٹریس ءَ برجم داشتگیں دیوان ءَ شوبگ آنی مھکمی ءِ جزم ءِ درشان کت۔ دوئیں پریک آں تجارت ءُ سرمایہ کاری ، جان سلامتی، ءُ وانگ ءُ زانگ، کشت ءُ کشار، سائنس ءُ ٹیکنالوجی، سیکرٹی، دود ءُ ربیدگ ءُ سیل ءُ سواد ءِ شوبگ آنی تہ ءَ یکوئی ءَ را مھکم جوڑ کنگ ءِ جزم ءِ درشان کت۔ ایشی ءَ چہ پیسر نیم روچ ءَ بندرانا ئیکے انٹرنیشنل ائیر پورٹ ءَ پجگ ءِ پد ءَ مزن وزیر عمران خاں ءَ وش اتک کت۔ مزن وزیر عمران خان گوستگیں سال صدر گوٹبیا راجا پاکسے ءُ مزن وزیر مہندراجا پاکسے ءِ سروکی ءِ سیٹ ءَ نندگ ءَ پد سری لنکا ءِ تر ءُ تاب کنوکیں اولی مزن وزیر انت۔ ایش دوئیں ملک آنی نیام ءَ یکوئی ءِ ارزشت ءِ درشان ءَ کنت۔ آ وتی سری لنکا ءِ ھمکار ءِ دعوت ءِ پد ءَ سری لنکا ءِ تر ءُ تاب ءَ کنگ ءَ انت۔
