وزیراعظم عمران خان اِرادے ئی دورہ غا سری لنکا غا روانہ مس، بڑزکو کہول انا اوڑدہی، جوائنٹ ٹریڈ اینڈ انویسٹمنٹ کانفرنس اٹ بشخ ہلیک

اسلام آباد۔ 23 فروری (اے پی پی) وزیراعظم عمران خان تینا سری لنکن ہم منصب مہنداراجاپاکسے نا سلہ غا سری لنکا غاروانہ مس۔ وزیراعظم نا سری لنکا نا دا دورہ اِرادے انا مریک۔ وزیراعظم آفس نامیڈیا ونگ انا کنڈآن جاری بیان نا رداٹ وزارت عظمیٰ نا منصب ءِ سنبھالنگ آن پد وزیراعظم عمران خان نا سری لنکا نا دا اولیکو دورہ ءِ۔ وزیراعظم دورہ ٹی سری لنکا نا صدر و تینا ہم منصب تون اوڑدہی کیک وخت اس کہ دورہ ٹی بڑزکو کہول انا اوڑدہی تیٹی واپار، زرکاری، جان جوڑی، تعلیم، کشت وکشار و سائنس و ٹیکنالوجی تون اوار چندی بشخ آتیٹی ہڑتوم آ کنڈآتا کمکاری ءِ مون آ دننگ آ گپ وتران مریک۔ ہڑتوم آ ملک آتا نیام اٹ چندی بشخ آتیٹی مفاہمت نا یات داشت آتیا دستخط ہم مریک۔ وزیراعظم جوائنٹ ٹریڈ اینڈ انویسٹمنٹ کانفرنس اٹ ہم بشخ ہلیک۔ پاکستان و سری لنکا نا نیام اٹ 1948آن سنگتی نا سوگو تعلق جوڑ ءِ۔ وزیراعظم عمران خان نا دادورہ ہڑتوم آ ملک آتا نیام اٹ تعلقداری و کمکاری ءِ مون آ دننگ اٹ کمکار مریک۔