اسلام آباد۔ 23 فروری (اے پی پی) صدر مملکت ڈاکٹر عارف علوی پارینے کہ پاکستان ازبکستان تون تعلقداری تے بھاز اہمیت ایتک، ہڑتوم آ ملک آتا نیام اٹ سیاست، واپار، زرگزران و دودوربیدہ تون اوار تین پہ تینی فائدہ غاتا غٹ بشخ آتیٹی کمکاری ءِ مون آ دننگ نا گرج ءِ۔ او ازبکستان اٹ پاکستان نا پندار سفیر سید علی اسد گیلانی تون گپ وتران کریکہ ہرا سے شنبے نادے آ داڑے اوڑتون اوڑدہی کرے۔ صدر مملکت پارے کہ سیاست، واپار، زرگزران و دودوربیدہ تون اوار تین پہ تینی فائدہ غاتا غٹ بشخ آتیٹی ازبکستان تون تعلقداری تے پین سوگوی تننگ نا گرج ءِ، ہڑتوم آ کنڈآتا اہمیت نا باندات، علاقائی حالیت و ایلو باندات آ گپ وتران کروئی مریک۔ صدر عارف علوی پارے کہ ہڑتوم آ ملک آتا نیام اٹ بڑزکو کہولی دورہ، پارلیمانی ہن وبر و وزارتی رابطہ غاتا گرج ءِ۔ اوپندار سفیر آ زور شاغا کہ او ہڑتوم آ ملک آتا نیام اٹ واپاری وزرگزرانی تعلقداری تے مون آ دننگ، ازبکستان اٹ پاکستانی تیار کروک مصنوعات، دوائی و خذمت آتا برآمد آتے ودفنگ کن کاریم کے۔ صدر مملکت مستی پارے کہ پاکستان اٹ سیل و سوات نا مون آ دننگ و ازبکستان تون دودوربیدہ ئی رابطہ غاتے سوگوی تننگ کن کاریم کننگے، ہڑتوم آ کنڈآتا تعلقداری تے پین سوگوی تننگ کن پارلیمانی ہن و بر ءِ مون آ دننگ نا گرج ءِ۔
