اسلام آباد۔ 23 فروری (اے پی پی) بنجائی وزیر حوالکاری و شینکاری سینیٹر شبلی فراز پارینے کہ وزیراعظم عمران خان مدام چیلنج آتے امنا کرے، (ن) لیگ حلقہ این اے 75 نا 20 پولنگ اسٹیشن تیا دُوارہ گچین کاری نا خواست کرے، ری پولنگ نا فیصلہ ءِ الیکشن کمیشن کیک ہرادے نن امنا کینہ، پی ٹی آئی ہمو جماعت ءِہرا الیکٹرانک ووٹنگ نا سلاہ تس۔ گچین کاری تا شفافیت آ اپوزیشن نا دوآبہ انت اکن ءِ۔ داہیت ءِ او سے شنبے نادے آ الیکشن کمیشن آف پاکستان نا پیشن میڈیا تون گپ وتران کرسا پارے۔ بنجائی وزیر حوالکاری و شینکاری پارے کہ وزیراعظم عمران خان کس اسے نا دباؤ ٹی بتنے، اومدام چیلنج آتے امنا کرے، وزیراعظم مسلم لیگ (ن) نا ڈسکہ نا 20 پولنگ اسٹیشن تیٹی ری پولنگ نا چیلنج ءِ ہم امنا کرے، انشاء اللہ اوفتے پبی ہزیمت تون مون تروئی تمک۔ اوپارے کہ مسلم لیگ (ن) مدام دھاندلی نا بنداو آ ملک اٹ سیاست نا خریدوفروخت نا روایت ءِ جوڑ کرے و اینو خسین ءُ انتئے کہ اوفک دادے تینا پیدائشی حق تکرہ کہ ہرا گچین کاری تے اوفک کٹر او سہی و ہرافتے باایتر او غلط ءُ اوپارے کہ گچین کاری تا شفافیت نا بارواٹ اوفتا دو آبہ انت اکن ءِ۔ سینیٹ گچین کاری تیٹی اوپن بیلٹنگ نا دا انت اکن مخالفت ءِ کننگ ءُ۔ اوپارے کہ پی ٹی آئی اسٹ انگا پارٹی ءِ ہراالیکٹرانک ووٹنگ نا سلاہ تس۔ اوپارے کہ پاکستان مسلم لیگ (ن) و اونا سیوتیک مدام خریدوفروخت کریر۔ دااوفتا طرہ امتیاز ءِ، اوفک اسہ گچین کاری اسے ہم جوان وڑاٹ کتنو۔ بنجائی وزیر پارے کہ دافک مدام ہندن ءُ روایت جوڑ کریر ہراڑآن دا زرس ہم اسہ کنڈ مریر تو اوفتے تینا حیثیت نا معلوم مرے۔ بنجائی وزیر پارے کہ دافک پارلیمنٹ اٹ اوپنگ بیلٹنگ نا مخالفت ءِ کننگ ءُ، داوڑ ہمو کننگ کیک ہرانا ارادہ دھاندلی و خریدوفروخت مرے۔ اوپارے کہ پی ٹی آئی مدام غٹ گڑاتے جوان وڑاٹ سرتس ولے دافک مدام دروغ آ مبنی ہیت کریر۔ اومستین اٹ ہم کیلبری فونٹ انا کمک اٹ دروغ تڑیر کہ لندن تو انت پاکستان اٹی ہم اوفتا ہچ ءُ جائیداد اس اف۔ سینیٹر شبلی فراز پارے کہ اوفتا مچ آ سیاست درو و جعل سازی آٹی ءِ۔ اوپارے کہ رانا ثناءاللہ و جاوید لطیف ءِ امن خراب کننگ نا آزموندہ ارے۔ ڈسکہ نا ضمنی گچین کاری تیٹی دافک ہموڑے ساڑی ئسر۔ اومچ آ گچین کاری عمل ءِ بھس کریر۔ اِراجان زیان مسر۔ ڈسکہ ٹی زوال کروک آتا خاہوت آتا خواست ءِ کہ اوفتے اوفتا کروک نا سزا تننگے۔ اوپارے کہ قوم اوفتا فریب اٹ بف، ہراوڑنا داسیاست کننگ ءُ او کرپشن آن پُرتموک ءُ۔ اوپارے کہ پنجاب اٹ اوفتا وونٹ بینک شیف و ننا وونٹ بینک بڑزا ہِننگ ءِ۔ اسہ سوج اسے نا ورندی ٹی اوپارے کہ ری پولنگ نا بابت فیصلہ الیکشن کمیشن کیک، اونا فیصلہ ءِ نن امنا کینہ۔ اسہ پین سوج اسے نا ورندی ٹی اوپارے کہ اپوزیشن نا وکیل سپریم کورٹ اٹ سینیٹ گچین کاری تا اوپن بیلٹنگ نا مخالفت ءِ کننگ ءِ، گچین کاری تا شفافیت آ اپوزیشن نا دوآبہ انت اکن ءِ۔
