اسلام آباد۔ 23 فروری (اے پی پی) بنجائی وزیر منشیات تور بریگیڈیئر (ر) اعجاز احمد شاہ پارینے کہ ورناچین اٹ منشیات نا نسخان تا بابت آگاہی المی ءِ، بروک آ چین تیکن منشیات آن پاک و رکھوک راج اسے نا ٹہیفنگ ءِ پک کروئی ءِ۔ داہیت ءِ او سے شنبے نادے آ ریجنل ڈائریکٹوریٹ اینٹی نارکوٹکس کنٹرول اے این ایف راولپنڈی و ری ہیبلی ٹیشن سینٹر نا دورہ ءِ کننگ نا وخت آ پارے۔ بنجائی وزیر پارے کہ منشیات نا گواچی بندغ آتا بحالی کن آسراتی تے پین گچین کننگے۔ اودرمان مروک بندغ آتا دمدستی بحالی کن گام گیج کننگ نا پارت کرسا پارے کہ بحالی نا داوڑ ءُ پین ادارہ جوڑ کننگ آسجفنگ اُن۔ اوپارے کہ منشیات نا گواچی بندغ آتا پروفیشنل ٹریننگ ہم کرفنگے۔ بنجائی وزیر پارے کہ منشیات نا گواچی بندغ آتا بحالی کن حکومت ہروڑکمک کیک۔ اوپارے کہ داہیت انا خیال تخنگے کہ تندرست مروک آ بندغ آک دُوارہ دالعنت اٹ اختہ مفس۔ دراخ جوڑ مننگ آن پد ہم اوفتا باقاعدہ چیک اپ ءِ برجاتخنگے۔ بنجائی وزیر منشیات تور اعجاز احمد شاہ اے این ایف نا کارکڑد نا ستاءِ کرسا پارے کہ منشیات نا پورو چٹفنگ اسکان جہد ءِ برجاتخنہ۔ ملک و قوم انا روشنا آخبت کن منشیات نا ویل انا مون ءِ توننگ بھاز المی ءِ۔
