اسلام آباد۔ 23 فروری (اے پی پی) پاکستان جہانی برادری آ زور شاغانے کہ او مقبوضہ جموں و کشمیر اٹ زالبول آتیا بیدادی نا چٹفنگ کن گام گیج کے۔ سے شنبے نادے آ دفترخارجہ پارے کہ مقبوضہ جموں و کشمیر اٹ منظم بیدادی و اجتماعی زیادتی نا واقعہ یو این ہائی کمشنر انسانی حق اتون اوار چندی آزاد کمشنر، انسانی حق انا تنظیم، جہانی میڈیا و سول سوسائٹی تنظیمک دستاویزی دروشم اٹ جاری کرینو۔ ترجمان پارے کہ اینو نن، 23 فروری 1991ء آ مقبوضہ کشمیر نا خلق کنن و پوشپورہ ٹی کشمیری زالبول آتا اجتماعی زیادتی نا است ہسونی واقعہ غاتے یات کننگ اُن۔ دا بدبخت دے جہانی برادری نا اجتماعی یات داشت آ اسہ مون ءُ داغ اسے آنبار نقش ءِ۔ ترجمان پارے کہ زموار آتا احتساب نا کمتی و زہمی تیکن انصاف نا مفننگ نا سوب آن بھارت داسہ ہم انسانی حق و کانود نا حکمرانی نا خلاف ورزی تا چرجوئی ءِ برقرار تخانے۔ بھارت داسہ ہم تینا غیر کانودی کوزہ ٹی علاقہ ٹی ریپ، بیدادی و کشمیری زالبول آتا قتل ءِ ریاستی دہشت گردی نا آلہ نا وڑاٹ کاریم اٹ اتنگ ءِ۔ ترجمان پارے کہ پنچ اگست 2019ء نا غیر کانودی اسہ کنڈی گام گیج آن پد بھارتی فورس آتا کنڈآن گھناؤنی ڈوہ اٹ پین ترندی بسنے۔
