اسلام آباد۔ 23 فروری (اے پی پی) برجامالی سال اٹی جم قومی برآمد آتیٹی 5.53درسد ودکی مسنے۔ ادارہ شماریات پاکستان (پی بی ایس) نا رپورٹ نا رداٹ اینخو مالی سال انا اولیکو ہفت تُو اٹی جولائی آن جنوری 2020-21ء ٹی ملک انا جم برآمدآک 14.242 ارب ڈالر اسکان ودار وخت اس کہ تدوک آ مالی سال انا ہندا وخت اٹی پاکستان برآمد آتا کمک اٹ 13.496ارب ڈالر زرمبادلہ کٹیا کریسس۔ ہنداوڑ تدوک آ مالی سال انا مقابلہ ٹی اینخو مالی سال اٹی جم قومی برآمد آتیٹی 74 کروڑ 60 لکھ ڈالر یعنی 5.53درسد ودکی ریکارڈ کننگانے۔ ایلو کنڈآ ہنداوخت اٹی درآمد آتیٹی ہم 6.92درسد ودکی ٹی درآمد آتا کچ 27.316ارب ڈالرنا مقابلہ ٹی 29.205ارب ڈالر اسکان سرمس۔ پی بی ایس نا رداٹ جنوری 2020ءنا مقابلہ ٹی جنوری 2021ء ٹی ملکی برآمد آتیٹی 8.111 درسد ودکی مسنے و برآمد آتا مالیت 1.972 ارب ڈالر نا مقابلہ ٹی 2.132ارب ڈالر اسکان ودا۔ ہنداوڑ داوخت اٹی جم درآمد ہم 14.85 درسد ودکی آن 40.121ارب ڈالرنا مقابلہ ٹی 4.733 ارب ڈالر اسکان ودار۔ رپورٹ نا رداٹ دسمبر 2020نا مقابلہ ٹی جنوری 2021ء ٹی ملکی برآمد آتیٹی 9.89 درسد کمتی واقع مسنے و برآمد آتا کچ 2.366ارب ڈالر نا مقابلہ ٹی 2.132ارب ڈالر اسکان کم مسنے۔
