بلوچستان نا مُر مُر انگا خاص وڑاٹ پسماندہ علاقہ غاتیٹی خور و غذائیت نا بابت پبی السی مہم اس چلیفنگ نا گرج ءِ، گورنر بلوچستان امان اللہ خان یاسین زئی نا ایف اے او نا کنٹری نمائندہ تون اوڑدہی ٹی گپ وتران

کوئٹہ۔ 23 فروری (اے پی پی) گورنر بلوچستان امان اللہ خان یاسین زئی پارینے کہ بلوچستان اٹی کشت وکشار، ماہی گیری و لائیو اسٹاک نا بشخ آتے پوسکن آ وڑڈول آتیا اتنگ کن آبی کوڑی تیٹی ودکی کروئی مریک گویا نن پوسکن آ آبی کوڑی تا تفنگ آن غذائی کاختی نا مون ءِ توننگ نا قابل مننگ کینہ۔ خور و غذائیت نا بابت حکومتی گام گیج آتیان بیدس ملکی و جہانی ادارہ غاتا کمک و راہشونی نا ہم سخت گرج ءِ۔ داہیت ءِ او سے شنبے نادے آ پاکستان اٹ تعینات اقوام متحدہ نا فوڈ اینڈ ایگریکلچر آرگنائزیشن نا کنٹری نمائندہ ریبیکابیل تون اوڑدہی ٹی گپ وتران کرسا پارے۔ داوخت آ گورنر امان اللہ خان یاسین زئی پارے کہ موسمیاتی بدلی و پِرتا سوب آن بلوچستان نا کشت وکشار و لائیو اسٹاک آ منفی اثرمرتب مننگ ءِ۔ اوپارے کہ بزغر و ساہدار تخوک آ بندغ آتا کوشست آک پیدوار اٹ ودکی نا سوب مریرہ ہنداخاطرآن المی ءِ کہ اوفتا کاریم نا کچ ءِ ودفنگے و کشت وکشار و لائیو اسٹاک نا پوسکن ءُ مہارت ہیل تننگے۔ اوپارے کہ صوبہ بلوچستان نا مُر مُر انگا خاص وڑاٹ پسماندہ علاقہ غاتیٹی خور و غذائیت نا بابت پبی السی مہم اس چلیفنگ نا سخت گرج ءِ۔ گورنر یاسین زئی پارے کہ مزور و بزغر آتا خصوصی اہمیت نا رداٹ ساڑی حکومت اوفتا راجی آسراتی کن گام گیج کننگ ءِ۔ گورنر یاسین زئی اقوام متحدہ نا فوڈ اینڈ ایگریکلچر آرگنائزیشن نا کارکڑد نا ستاءِ کرسا پارے کہ چاہندار و پولکار آتا ٹیم اس جوڑ کننگ اٹ بلوچستان آن تعلقدار بشخ آتا چاہندار آتا ہلنگ نا فیصلہ ستاکڑزک۔