اسلام آباد۔ 22 فروری (اے پی پی)وزیر خارجہ مخدوم شاہ محمود قریشی تون چیئرمین کریسنٹ آرٹ گیلری ناصر جاوید نا کماشی ٹی ڈل دوشنبے نادے آ وزارت خارجہ ٹی اوڑدہی کرے۔چیئرمین کریسنٹ آرٹ گیلری وزیر خارجہ ءِ دا آرٹ گیلری نا پس منظر و داتم اسکان دوئی مروک آ سرسہبی تیان معلومدار کرے۔ ڈل انا باسک آک وزیر خارجہ ءِ پاکستان نا پنی آ آرٹسٹ تصدق سہیل ایماندار نا شہرہ ء آفاق پینٹنگ نا شینک مروک آ مجموعہ ءِ ہم پیش کریر۔ وزیر خارجہ جہانی شہرت یافتہ پنی آ آرٹسٹ تصدق سہیل ایماندار نا آرٹ ورک ءِ مچ کننگ و اودے کتابی ءُ دروشم اسے ٹی شینک کننگ نا بابت کریسنٹ آرٹ گیلری نا خذمت آتا ستاءِ کرے و پارے کہ پاکستان اٹ ٹیلنٹ نا ہچ ءُ کمتی اس اف۔ جوان ءُ پلیٹ فارم اسے نا مفننگ نا سوب آن، پاکستانی آرٹسٹ آتے تینا کاریم ءِ مون آ اتنگ کن سخت مشکل آتون مون تروئی تمک۔ شاہ محمود قریشی پارے کہ کریسنٹ آرٹ گیلری کون آ ادارہ غاک، پاکستانی آرٹسٹ آتا شہرہ ء آفاق پینٹنگ آتے درستی راستی کرفنگ اٹ نمان کڑد ادا کننگ کیک۔ ڈل انا باسک آک وزیر خارجہ ءِ خصوصی وڑاٹ جوڑ کروک آ، اونا پورٹریٹ اس ہم پیش کریر۔
