اسلام آباد۔ 22 فروری (اے پی پی) صدر مملکت ڈاکٹر عارف علوی ملک انا تعلیمی نظام ءِ پوسکن آ دور انا خواست آتون ہم گرنچ کننگ نا گرج آ زور شاغسا پارے کہ آخبت انفارمیشن ٹیکنالوجی و مصنوعی ذہانت تون گنڈوک ءِ، تعلیمی ادارہ و صنعت نا نیام اٹ گچین رابطہ غان نئے بیرہ ورناتے جوان ءُ روزگار نا وارخواہی دُوبریک بلکن داڑآن صنعت نا شونداری نا گمان آک ہم ودی مریرہ۔ اودوشنبے نادے آ داڑے نیشنل یونیورسٹی آف ٹیکنالوجی ٹی بی ایس انجینئرنگ ٹیکنالوجی نا بناءِ کننگ نا دود آن تران کریکہ۔ دا دود اٹی بنجائی وزیر سائنس اینڈ ٹیکنالوجی چوہدری فواد حسین، ہائیر ایجوکیشن کمیشن نا چیئرمین، یونیورسٹی نا انتظامیہ و فیکلٹی باسک آتیان بیدس طالب علم آک ہم ساڑی ئسر۔ صدر مملکت یونیورسٹی نا کنڈآن بی ایس انجینئرنگ ٹیکنالوجی نا بناءِ کننگ نا خیرمقدم ءِ کرسا اودے ملک انا آخبت نا گرج آتا بابت اہم ءُ گام اس گوندا۔ اوپارے کہ ننا ملک اٹ خوانوک آ ورناتے ملازمت آتا دوئی کننگ اٹ مشکل پیش بننگ نا بھلا سوب دا مسنے کہ روایتی تعلیم پوسکن آ دور انا خواست و خاص کر صنعت نا گرج آتون ہم گرنچ اف۔ ننے دا ویل انا ایسری کن اکیڈیمیا و صنعت ءِ باہم منسلک کننگ نا گرج ءِ۔ اوپارے کہ تعلیمی ادارہ غاک صنعت نا گرج آتے مون آ تخسا افرادی قوت فراوان کننگ اٹ لگر تو نئے بیرہ ورناتے جوان ءُ روزگار نا وارخواہی دوبریک بلکن داڑآن صنعت نا شونداری نا گمان آک ہم ودی مریرہ، دامسخت کن اوفتا نیام اٹ رابطہ غاتے مون آ دننگ وخت انا خواست ءِ۔ صدر مملکت پارے کہ آخبت انفارمیشن ٹیکنالوجی و مصنوعی ذہانت تون گنڈوک ءِ، دانا تیاری کن طالب علم آتے پوسکن علم و کسب آن شُپ کروئی تمک ہراڑکن تعلیمی ادارہ غاتا کڑد بھاز اہم ءِ، دابابت ٹرینرز آتا تربیت نا ہم بایدے بست وبند مرے۔ صدر مملکت پارے کہ اونا تغ و دعا ءِ کہ پاکسان اسہ شون ہلوک و واکدار ملک اس جوڑ مرے، داڑکن اونا ذہن اٹ ہرابشخ انا تصور غٹ آن مست بریک او انفارمیشن ٹیکنالوجی نا بشخ ءِ۔
