اسلام آباد۔ 22 فروری (اے پی پی) پارلیمانی کشمیر کمیٹی نا چیئرمین شہریار خان آفریدی پارینے کہ حوالکاری نا دا دور اٹی چیلنج آتون مون تننگ کن اسہ جامع حکمت عملی اس تیار کننگ نا گرج ءِ انتئے کہ دشمن ریاست پاکستان نا بنداو ءِ ہدف کننگ کن بے تُک وسیلہ غاتے خڑچ کننگ ءِ و جعلی خبرآک دشمن نا چم آتا بشخ اسے ءُ۔ دوشنبے نادے آ کشمیر کمیٹی و انسٹی ٹیوٹ آف ریجنل اسٹڈیز نا کنڈآن ’’ڈس انفارمیشن، تزویراتی جنگ انا آلہ‘‘ نا سرحال آن اڈ ہلوک آ سیمینار نا بشخ ہلوک آتیان تران کرسا شہریار آفریدی پارے کہ مودی نا ہندوستان اسٹریٹجک و سیاسی مسخت آتیکن پاکستان نا برخلاف منفی بیانیہ ءِ استعمال کرینے۔ معلومداری نا زمانہ ٹی ریاستی عمل معلومداری ءِ اسٹریٹجک و ہائبرڈ جنگ انا اسہ آلہ سے نا وڑاٹ استعمال کرینے۔ اوپارے کہ معلوماتی جنگ ریاست نا بیانیہ نا جوڑاکن اسہ پوسکن ءُ وسیلہ اسے۔ اوپارے کہ یورپی یونین نا ڈس انفولیب انا رپورٹ بھارتی دروغ و فریب ءِ بے نقاب کرینے انتئے کہ ہندوستانی میڈیا و این جی اوک بھارتی پروپیگنڈا نا اسہ ذریعہ اس جوڑ مسنو انتئے کہ بھارت پاکستان ءِ بدنام کننگ کن جعلی میڈیا ہاؤسز و جعلی سوشل میڈیا پلیٹ فارم آتے استعمال کرے۔ اوپارے کہ دُن تو معلومداری معمولی ءُ جنگ اسے نا بشخ ءِ ہنداخاطرآن میڈیا ءِ دا پہہ مننگ نا گرج ءِ کہ ہراوڑ شیطانی زموارآک تینا مسخت آتیکن میڈیا بیانیہ ءِ غلط وڑاٹ کاریم اٹ اتنگ کیرہ۔ شہریار آفریدی پارے کہ ہندوستانی حکومت 1948ء ٹی ہندوستانی میڈیا ءِ تینا قومی تعمیراتی ڈٹ اٹ اوار کرے و ہندوستانی میڈیا سرکاری بیانیہ ءِ مون آ درے و ہنداسوب آن ہندوستانی پروپیگنڈا مشین اٹ فریق جوڑ مس۔ اوپارے کہ ایلو کنڈآ مستین اٹ پاکستانی ریاست پاکستانی میڈیا ءِ گوجالا و شیطانی واکدارآک دا موقع غان فائدہ ہرفیر۔ اوپارے کہ بدبختی اٹ میڈیا ہاؤس آتے قومی فائدہ و قومی گپ وتران نا بارواٹ حساسیت نا احساس کننگ آن بیدس میڈیا ءِ بھاز آجوئی تننگا۔ شہریار آفریدی پارے کہ دشمن دا بھاز انگا آجوئی ءِ ریاست پاکستان نا برخلاف تینا ہائبرڈ جنگ اکن کاریم اٹ ایس۔ آفریدی پارے کہ بھارت میڈیا نا ناروا کاریم اٹ اتنگ نا کمک اٹ دا ڈیہہ ٹی جنگ و جھیڑہ کن پاکستانی ریاستی ادارہ غاتے بدنام کننگ و دنیا ءِ راضی کننگ کن ہم تینا مہم ءِ کاریم اٹ ایس۔ اوپارے کہ ہندوستانی ریاست و اونا میڈیا کشمیری تا آجوئی نا جہد ءِ دہشت گردی اتون گنڈنگ کن کاریم کریر وخت اس کہ حقیقت دادے کہ کشمیری تا آجوئی نا جہد اقوام متحدہ نا چارٹر نا رداٹ ہندوستان نا کوزہ گیر فوج انا برخلاف جائز ءِ۔ اوپارے کہ بھارتی غیر کانودی وڑاٹ مقبوضہ جموں و کشمیر اٹ بھارتی کوزہ گیر فوج کودک کشمیری تا برخلاف جنگی ڈوہ تا ارتکاب کننگ ءِ ہرافتے بھارت نا جلہو گیر فوج انا برخلاف جنگ کننگ نا روا حق دوئی ءِ۔ اوپارے کہ معلومداری دور انا چیلنج آتے مون آ تخسا، پاکستانی ریاست ءِ جعلی میڈیا ہاؤسز و سوشل میڈیا تون ہرکنڈآن مسلط دشمن و اونا ہائبرڈ جنگ اتون مون تننگ کن حکمت عملی اس تیار کننگ نا گرج ءِ۔ اوتعلقدار محکمہ غاتیان خواست کرے کہ او سوشل میڈیا نا ضابطہ غاتیٹی ہم گچینی اتیر و مستین نا ردینک آتیان سبخ ہلیر۔
