اسلام آباد۔21فروری (اے پی پی):چیئرمین سینیٹ محمد صادق سنجرانی ءَ گوشت کہ پاکستان ریلویز سیل ءُ سواد ءِ دیمروئی ءَ کلیتی کرد ءِ پیلو کت کنت، ٹورسٹ سفاری ٹرین اے رد ءَ ارزشتی ایں گام ات، اے ھیالانی درشانی آئی ءَ وزیر ریلوے سینیٹر اعظم خان سواتی ءِ ھمبراھی ءَ گولڑہ ریلوے سٹیشن ءِ سر ءَ سفاری ٹرین ءِ بنگیج کنگ ءِ موہ ءَ کت۔ ٹورسٹ سفاری ٹرین ھمک آدینگ ءُ یک شمبے ءِ روچ ءَ سیل ءُ سوادی مردم آناں گولڑہ سٹیشن ءَ حسن ابدال، اٹک خورد ءُ اٹک سٹی ءُ کش ءُ کرّے ءِ ھند آں سیل ءُ سواد کنائین ایت۔ چیئرمین سینیٹ ءَ گوشت کہ ٹورسٹ سفاری ٹرین حکومت ءِ نیمگ ءَ ھندی سیل ءُ سواد ءِ دیمروئی ءِ واستہ ارزشتی ایں گام انت سفاری ٹرین ءِ بندات جوانیں گام ات، ایش سیل ءُ سواد ءِ یک وسیلگ ءِ جوڑ بیت۔
