پیسریگیں سروک آں راج  ءَ را وامدار کتگ ، ڈن ملک ءَ وت باشاہی زند گوازینگ ءَ انت،  بلین ٹری سونامی منصوبگ ءَ را کامیات جوڑ کنگی انت، کامرہ ءَ ٹیکنالوجی زون جوڑ کناں، مزن وزیر عمران خان ءِ غازی بروتھا ءَ مراگش ءَ گوں گشتانک  

اٹک۔19فروری  (اے پی پی): مزن وزیر عمران کان ءَ گوشت کہ پیسریگیں مزن وزیر  ءُ  ایندگر وزیر آں ڈن ملک ءَ ماڑی بستگ،  راج ءَ را وامدار کتگ  وت ڈن ملک ءَ شتگ ءُ نشتگ انت ءُ  باشاہی زند گوازینگ ءَ انت ، آئی پت ءِ سائیکل ءِ دکان ءِ بوتگ مرچی رولز رائس گاڑی  آنی مالک انت، سینٹ الیکشن ءَ تماشا بوھگ ءَ انت، ووٹ بھا زورگ ءِ واستہ منڈی جنگ بوتگ،  نیاد بندگ بوھگ ءَ انت،  اپوزیشن  ءِ جلوس مارا  ڈگار ءَ جت نہ کنت،  نوں مردم آناں  بھا زورگ ءُ وتی  گیش سینیٹر گچین کنگ لوٹاں  اے کجام جمہوریت انت،  گوستگیں وھد ءُ باریگ ءَ جنگل آناں  گڈگ بوتگ، موسمی مٹ ءُ بدلی ءِ رند پد  آنی گوما گر ءُ چیل بوھگ ءِ واستہ بلین ٹری سونامی منصوبگ ءَ را کامیات  جوڑ کنگی انت، خیبر پختونخوا ءِ وڑ ءَ پنجاپ ءَ  ھم گوزوکیں سال ءِ گڈ ءَ تاں توامیں شہری الس آناں ہیلتھ انشورنس ءِ آسراتی رسیت، ورنا آناں روزگار ءِ پجاریءِ واستہ  کامرہ  ءَ ٹیکنالوجی زون ءِ جوڑ کنگ بیت۔ اے ھیالانی درشانی آئی ءَ  آدینگ ءِ روچ ءَ  غازی بروتھا ءَ  نھال کشگ ءِ   رد ءَ بست ءُ بند کتگیں مراگش ءَ گوں گشتانک دیان ءَ کت۔ مزن وزیر ءَ  گوشت کہ پاکستان بد بھتی ءَ اے 10  ملک آنی تہ ءَ ھوار انت ھما کہ موسمی مٹ   ءُ بدلی  رند پد آں چہ گیش آما چ بوتگ انت۔ گرین ہائوسز گیس آنی   سبب ءَ دگنیا ءِ  گرمی گیش  ودگ ءَ انت۔  ایشی ءِ واستہ مارا   ھما گام چست  کنگی انت  ھما ئی ءِ سبب ءَ گرمی کمتر بوت بہ کنت  ءُ اے مول  ءُ مراد ءِ واستہ 10 ارب درچک  کشگ ءِ پروگرام  ءَ را کامیات جوڑ کنگ  ضلورت انت۔ درچک مئے آیوکیں باندات ءِ واستہ سک باز ضلوری انت۔  ادا 10 لکھ درچک کشگ بوھگ ءَ انت بلے  ایشانی رکھینگ ءِ زمہ وار ورنا انت ءُ ایشی ءَ ھوار ورنا آناں لیب ءُ گوازی ءِ  پڑ  جوڑ کناں دیاں،  ورنا آئی واستہ لیب ءُ گوازی پڑ ءِ پجاری حکومت ءِ اولی  ترجی انت۔  درچک مئے آیوکیں باندات ءِ واستہ  ورنا آنی جان سلامتی ءِ  ھاترا ضلوری انت۔  70 سال ءَ چہ جنگل ءُ درچک آناں بے دردی ءَ گوں  گڈگ بوتگ ءُ  درچک کشگ نہ بوتگ۔ آئی ءَ گوشت کہ چھانگا مانگا، چیچہ وطنی ءُ کندیاں ءَ ٹوھیں ٹوھیں جنگل  بوتگ ایشاناں گڈگ بوتگ، بازیں جاہ ءَ  کبزہ کنگ بوتگ انت ءُ گس جوڑ کنگ بوتگ، لاہور ءَ 20 سال ءَ 70  درسد درچک آناں گڈگ  بوتگ ایشی ءِ سبب ءَ ایٹماسپیئر ءِ ھرابی ءَ گیشی بوتگ۔  مزن وزیر ءَ گوشت کہ گوستگیں 30 سال ءِ ساھت ءَ  مزن مزنیں کرپٹ مردم ءُ ڈاکو آں حکومت  ءُ سروکی کتگ  ایشاں ملک ءِ زر دُزئی کتگ ۔ آئی ءَ گوشت  کروڑاں زر ھرچ کنگ ءُ سینیٹر جوڑ بوھوکیں مرد  الس ءِ ازمت ءَ نہ کنت ایش ھون ءَ چونس ایت۔ آئیءَ گوشت کہ راج پیسلہ  کنگ ءِ موہ ءَ اوشتاتگ، یک نیمگ ءَ پاکستانءِ  الس انت ءُ دومی نیمگ ءَ ڈاکو ءُ مافیا انت، بلے انشاء اللہ باج برئی  راستی ءِ بیت۔