اسلام آباد۔ 19 فروری (اے پی پی) بنجائی وزیر توانائی عمر ایوب خان پارینے کہ ساڑی حکومت مستین نا حکومت آتا کنڈآن ملکی زرگزران نا بنداو تیٹی تالان کروک آ سرنگ آتے صاف کننگ ءِ، بھلا صنعت آتا پیداوار و برآمد آتیٹی ودکی مننگ ءِ۔ جمعہ نادے آ قومی اسمبلی ٹی کبینی آ شرہ ٹی اپوزیشن نا کنڈآن چست کروک آ ٹک آتا ورندی ءِ ترسا عمر ایوب خان پارے کہ ملکی زرگزران نا بنداو تیٹی بارودی سرنگ مستین نا حکومت آک تالان کرینو۔ 2013ء ٹی 185 ارب گردشی وامک ئسر، مستین نا حکمرانک بجلی نا کبین معاہدہ کریر ہراتم اوفتا حکومت چٹا تو اوفک کبین بجلی نا کارخانہ جوڑ کریر اوٹی 2018ء ٹی المی زرتس 642 ارب روپئی اسکان سرمس۔ دا اوفتا نابودی ئس۔ 2023اسکان کپیسٹی زرتس 1455 ارب اسکان ودرہ۔ دافک پاکستان نا الس ءِ گہیو تخار۔ کار انا معاہدہ غان ملک انا بیڑہ ءِ غرق کننگاکہ، اودے نن ایسر کرینن۔ آئی پی پیز آتون معاہدہ غان 800 ارب نا فائدہ مریک وخت اس کہ دانا جم فائدہ 3000 ارب اسکان مننگ نا اندازہ ءِ۔
