اسلام آباد۔ 19 فروری (اے پی پی) بنجائی وزیر حوالکاری و شینکاری سینیٹر شبلی فراز پارینے کہ وزیراعظم عمران خان نا بنداوی مسخت سیاست اٹ پیسہ نا کاریم اٹ اتنگ ءِ چٹفنگ نا ءِ، میثاق جمہوریت آ دستخط کروک آ مسلم لیگ ن و پیپلزپارٹی تینا 10 سالہ دور اقتدار اٹ گچین کاری تیٹی شفافیت کن ہچ ءُ عملی گام گیج اس کتوس۔ وصیت آ دستخط آتے اہمیت تروک آتے معلوم مرے میثاق جمہوریت آ ہم بے نظیر بھٹو نا دستخط ئس۔ پاکستان نا 22 کروڑ الس داہیت آ قائل مسنو کہ گچین کاری تا نظام شفاف مرے، ننا کانودی شرہ ہم ہندادے کہ پارٹی یا الائنس اسے نا کنڈآن پندار اومیتدار سینیٹ نا باسک گچین مرے۔ او جمعہ نادے آ سینیٹ گچین کاری تے اوپن بیلٹ اٹ کرفنگ نا بابت معاملہ نا سماعت آن پد سپریم کورٹ نا پیشن میڈیا تون گپ وتران کریکہ۔ سینیٹ ناقائمہ کمیٹی حوالکاری و شینکاری نا چیئرمین سینیٹر فیصل جاوید ہم اوڑتون اوار ئس۔ بنجائی وزیر سینیٹر شبلی فراز پارے کہ عمران خان اسہ ہندن ءُ لیڈر اسے ہرا دا ملک اٹ بنداوی اصلاحات نا کمک اٹ جمہوریت و پارلیمنٹ ءِ سوگو کرسا اودے الس نا است خواہی تا ترجمان جوڑ کننگ خواہک، ہراتم پارلیمان اٹ شفافیت آن ایم پی اے تا وونٹ آتے اٹ گچین مرسا سینیٹر آک بریرہ تو او ملک و صوبہ نا فائدہ ٹی کاریم کیرہ، ننا بنداوی مسخت ہندادے کہ سینیٹ گچین کاری تیٹی پارٹی نا پندار اومیتدار آتے وونٹ رسینگے۔ مستین اٹ سینیٹ گچین کاری تیکن منڈیک لگارہ،داسہ وخت اس کہ سینیٹ نا گچین کاریک خڑک ءُ تو ہرچار آ صوبہ غاتیٹی سینیٹ نا گچین کاری تیکن منڈیک لگانو۔ اوپارے کہ سپریم کورٹ اٹ داوخت آ ہم کانودی شرہ ٹی ننا موقف ءِ کہ متناسب نمائندگی چائے او پارٹی نا دروشم اٹ مرے یا الائنس نا دروشم اٹ اونا بشخ کچ انا رداٹ مرے ہراکہ فارمولاءِ خلیر ننا پارٹی نا است خواہی و خواست ءِ کہ دانظام اٹ ہچ ءُ پرخ اس تمپک کہ دیر دِنا اومیتدار ءِ دانا معلوم مرے کہ دیراس دیر ءِ وونٹ تس۔ اوپارے کہ کنے خوشی ءِ کہ پاکستان نا الس دامعاملہ غا قائل مسنو کہ سینیٹ نا گچین کاریک پیسہ نا کاریم اٹ اتنگ نا جاگہ غا پارٹی یا الائنس نا کنڈآن پن کروک اومیتدار ہی سرسہب مرے۔ بنجائی وزیر سینیٹر شبلی فراز پارے کہ بلاول بھٹو تدوک آ دے پاریسس کہ او ہم داکنڈآ مائل مننگ ءِ، اونا پارٹی و مسلم لیگ (ن) میثاق جمہوریت اٹ مہالو آن داہیت ءِ کریسر کہ سینیٹ نا گچین کاری تے ششفافیت اٹ اوپن بیلٹ اٹ کرفنہ۔ اوپارے کہ گڑاس چیئرمین سینیٹ نا برخلاف بے پت انا بابت الس ءِ کنفیوژ کیرہ، اونا وضاحت گڑاس داوڑ ءِ کہ داسہ سینیٹ گچین کاری مننگ ءِ، نن غٹ داڑآ شرہ و دلیل تننگ اُن، بے پت ہاؤس نا داخلی ءُ باندات اس مریک داٹی جتا ءُ پالیسی اس مننگ کیک، ہاؤس اٹ بے پت و سینیٹ گچین کاری تیٹی پرخ ءِ، نن سینیٹ گچین کاری تیا ہیت کننگ اُن او سینیٹ نا داخلی معاملہ غا شرہ کننگ ءُ۔ اوپارے کہ بنداوی مسخت ملک آن پیسہ غاتا سیاست ءِ چٹفنگ نا ءِ۔
