اسلام آباد۔ 18 فروری (اے پی پی) وزیر خارجہ مخدوم شاہ محمود قریشی پارینے کہ پاکستان و مصر انا سرکڑدہ غاک ہڑتوم آ کنڈآتا تعلقداری و کمکاری ءِ پین سوگو کننگ کن سنبرینگوک ءُ۔ داہیت ءِ او قاہرہ ٹی پاکستانی کمیونٹی تون اوڑدہی ٹی پارے۔ داوخت آ قاہرہ ٹی پاکستانی سفارتخانہ نا نظام الامور شاہ نذر، ڈی جی دے ٹک نیامی ڈاکٹر محمد بلال و پاکستانی سفارتخانہ نا سینئر آفیسر آک ہم وزیر خارجہ تون اوار ساڑی ئسر۔ پاکستانی کمیونٹی وزیر خارجہ ءِ قاہرہ غا بخیر اٹ پاریر۔ وزیر خارجہ پاکستانی کمیونٹی تون گپ وتران کرساپارے کہ پاکستان و مصر انا نیام اٹ دیرینہ برادرانہ تعلقداری ءِ۔ پاکستان و مصر انا نیام اٹ ہڑتوم آ کنڈآتا واپار، زرکاری و چندی بشخ آتیٹی ہڑتوم آ کنڈآتا کمکاری ءِ ودفنگ نا بھلو گمان اس ارے۔ وزیر خارجہ مصر انا دورہ ٹی صدر عبدالفتح السیسی، وزیر خارجہ سامح شکری و مصری سرکڑدہ غاتون مروک آ اوڑدہی تا بابت پارے کہ خوشی نا ہیت دادے کہ ہڑتوم آ ملک آتا سرکڑدہ غاک ہڑتوم آ کنڈآتا تعلقداری ءِ پین سوگو کننگ و تین پہ تینی است خواہی نا بشخ آتیٹی ہڑتوم آ کنڈآتا کمکاری ءِ مون آ دننگ کن سنبرینگوک ءُ۔ پاکستانی کمیونٹی کورونا نا دین اٹ پاکستانی سفارتخانہ نا مثبت کڑد انا ستاءِ کرے۔ پاکستانی کمیونٹی وزیر خارجہ نا منت واری ءِ ہرفسا اودے سرسہب دورہ غا مبارکبادی تسر۔
