اسلام آباد۔ 18 فروری (اے پی پی) گورنر اسٹیٹ بینک رضاباقر پارینے کہ اسٹیٹ بینک پاکستان اٹ لس بندغ کن بینکاری ءِ آسان جوڑ کننگ کن تینا کڑد ءِ ادا کیک، سمندر آن ایپار پاکستانیک روشن ڈیجیٹل اکاؤنٹ نا آسراتی آن پبی فائدہ ہرفر۔ او پنچ شنبے نادے داڑے سمندر آن ایپار پاکستانی تیکن درستی راستی کرفوک روشن ڈیجیٹل اکاؤنٹ نا بابت دود آن تران کریکہ۔ وزیراعظم عمران خان داوخت آ مہمان خاص ئس، گورنر اسٹیٹ بینک روشن ڈیجیٹل اکاؤنٹ نا بناٹی کمک فراوان کننگ آ وزیراعظم، وزیر خزانہ، ایف بی آر، وزارت خزانہ و خاص کر سمندر آن ایپار پاکستانی تا خصوصی منت واری ءِ ہرفے ہرانا سوب آن اسٹیٹ بینک آف پاکستان نا دا پروگرام ءِ سرسہبی رسینگا۔ اوپارے کہ ایف بی آر و وزارت خزانہ روشن ڈیجیٹل اکاؤنٹ نا بابت خراج باندات آتے ایسر کننگ اٹ آسراتی ترسا سمندرآن ایپار پاکستانی تا پت اٹ ودکی کرینو۔ گورنر اسٹیٹ بینک پارے کہ وزیراعظم عمران خان نا وژن آن روشن ڈیجیٹل اکاؤنٹ سرسہب مسنے۔ اینو اسکان 88 ہزار اکاؤنٹ آن اگہ 500 ملین ڈالر نا ترسیلات مسنے تو اوڑآن کساس خلنگ مریک کہ اخس گنجائشت ارے۔ پیشن نا ملک آتیٹی رہینگوک آ پاکستانیک روشن ڈیجیٹل اکاؤنٹ ءِ آزموندہ کیر اوفتے مایوسی مفک۔ اوپارے کہ روشن ڈیجیٹل اکاؤنٹ نا بابت ٹیکسیشن نا ویل ءِ ایسر کننگانے۔ سمندرآن ایپار پاکستانی تے زرکاری آ بیرہ سورس آ خراج تروئی مریک اوفتے کٹیا غا ریٹرن فائل کننگ نا ضرورت مفک۔ روشن ڈیجیٹل اکاؤنٹ آن ترسیلات آ بینک آتا خڑچ 5 آن ہلیس 9 ڈالر اسکان بریک۔ اوپارے کہ یورپ و برطانیہ آن درخواست بسوسس کہ پوسکن آ پاکستان سرٹیفیکیٹ یورو و پاونڈ نا ڈی نومینیشن اٹ بایدے جاری مرے۔ داخواست آ نیا پاکستان سرٹیفکیٹس داسہ یورو و پاؤنڈ ڈی نومینیشن اٹ دستیاب مریک۔ اوپارے کہ زوت آن زوت روشن ڈیجیٹل اکاؤنٹ تون گنڈوک بینک آتا کچ 15 مریک۔ گورنر اسٹیٹ بینک پارے کہ داوخت آ سمندرآن ایپار پاکستانی تا کچ 7 آن 9 ملین اسکان ءِ، وخت اس کہ روشن ڈیجیٹل اکاؤنٹ تخوک سمندرآن ایپار پاکستانی تا کچ 88 ہزار ءِ۔ دارداٹ بھاز کچ ساڑی ارے۔ بینک آک دا کچ آن پبی فائدہ ہرفر۔ اوپارے کہ وزیراعظم عمران خان حکومت و اسٹیٹ بینک ءِ لس بندغ ءِ آسانی فراوان کننگ نا پارت کریسس، اسٹیٹ بینک تینا کڑد ءِ ادا کننگ ءِ، روشن ڈیجیٹل اکاؤنٹ و اڑزآن اُراتیکن رعایتی وام تا فراوانی ہندا چرجوئی نا کڑیک ءُ۔ اسٹیٹ بینک پاکستان اٹ لس بندغ کن بینکاری ءِ آسان کننگ کن تینا کڑد ءِ ادا کیک۔
