اسلام آباد۔ 18 فروری (اے پی پی) وزیراعظم نا نمائندہ خصوصی مذہبی ہم آہنگی و دے ٹک نیامی و پاکستان علماء کونسل نا چیئرمین حافظ محمد طاہر محمود اشرفی پارینے کہ زور اٹ برام و مذہب نا زور اٹ بدلی نا تصور اسلامی تعلیمات آتا برخلاف ءِ، رسول اکرم صلی اللہ علیہ و آلہ وسلم مچ آ انسانیت کن رحمت مرسا بسنے، غٹ مذہب و مکتبہ فکر انا مقدس آک محترم ءُ، گڑاس واکدار پاکستان اٹ پھسات تالان کننگ کن سوشل میڈیا ءِ غلط کاریم اٹ اتیرہ، پاکستان اٹ رہینگوک آ ہر پاکستانی نا حق انا محافظ ریاست ءِ، توہین ناموس رسالت و توہین مذہب نا کانود نا غلط استعمال مفننگ ءِ ، بین المذاہب ہم آہنگی کن این جی او و انسانی حق انا ادارہ غاتیان مثبت کڑدادا کننگ نا اومیت کینہ، ویل آتا ایسری کن این جی او و انسانی حق انا ادارہ غاتون رابطہ کننگ اُن و مذاکرات نا سلہ خلینہ۔ داہیت ءِ او چرچ آف پاکستان و انٹرفیتھ ہارمنی کونسل نا کنڈآن بنجائی دارالحکومت اٹ اڈہلوک آ قومی بین المذاہب زالبول کانفرنس آن تران کرسا پارے۔ کانفرنس آن بنجائی وزیر انسانی حق ڈاکٹر شیریں مزاری ، بشپ آف پشاور، انٹرفیتھ ہارمنی کونسل نا ورناتا امور نا کنوینئر مشتاق ئسک ہم تران کریر۔ حافظ محمد طاہر محمود اشرفی پارے کہ اسلام اقلیت آتا حق انا محافظ ءِ، پاکستان ءِ مسلمان و غیر مسلم اٹ اواری اٹ جوڑ کرینو، نابالغ مسڑ، زور اٹ برام اسلامی تعلیمات آتا برخلاف ءِ۔
