اسلام آباد۔ 18 فروری (اے پی پی) وزیر خارجہ مخدوم شاہ محمود قریشی پارے کہ ہڑتوم آ کنڈآتا تعلقداری ءِ سوگو کننگ، رابطہ غاتا مون آ دننگ و اسیجائی روڈ میپ آ ننا امنا مسنے، بھارت اٹ ہندو توا سوچ غالب مسنے۔ پنچ شنبے نادے آ دورہ مصر و علاقائی حالیت آتا بابت اسہ بیان اسے ٹی وزیر خارجہ پارے کہ پاکستان نا وزیر خارجہ نا دورہ مصر 9 سال آن پد مننگ ءِ، کنے دا پارسا خوشی محسوس مننگ ء، کہ تدوک آ دہ سال آن پاکستان و مصر انا تعلقداری ہرا تعطل نا گواچی ئسر او اول سرآن بحال مسنو۔ اوپارے کہ کنا درو مصر انا صدر عبدالفتح السیسی تون بھاز جوان ءُ نشست اس مس۔ اوپاکستان کن بھاز جوزہ غاتا درشانی ءِ کرے۔ اووزیراعظم عمران خان نا ستاءِ کرے۔ مصری صدر مسلم امہ نا بابت تینا ویژن نا درشانی ءِ کرے و ای علاقائی و ڈیہہ نا حالیت آتے اونا مون آ تخاٹ۔ کنا مصر انا وزیر خارجہ سامح شکری تون خصوصی ءُ نشست اس مس و ڈل آتا کہول آ مذاکرات مس۔ دا اوڑدہی ٹی نن سلابت اٹ آخبت کن اسہ جامع’’روڈ میپ‘‘ اس شین تسونن۔ دادورہ غان پد مارچ اٹ اسلام آباد اٹ پاکستان و مصر انا نیام اٹ بڑزکو کہولی سیاسی کمیشن سلابتی دیوان اس مریک وخت اس کہ اپریل نا ارٹ میکو ہفتہ ٹی نناجوائنٹ چیف آف اسٹاف مصر آ کاہک و ننا دفاعی تعلقداری تے مون آ دیک۔
