اسلام آباد۔ 18 فروری (اے پی پی) وزیر خارجہ مخدوم شاہ محمود قریشی قاہرہ ٹی عرب لیگ ہیڈکوارٹر نا دورہ ءِ کرے۔ عرب لیگ نا سیکرٹری جنرل احمد ابوالغیط وزیر خارجہ مخدوم شاہ محمود قریشی نا خیرمقدم ءِ کرے و اودے عرب لیگ ہیڈکوارٹر آ بننگ آ بخیر اٹ پارے۔ پنچ شنبے نادے آ دفترخارجہ نا رداٹ وزیر خارجہ مخدوم شاہ محمود قریشی سیکرٹری جنرل عرب لیگ اتون خصوصی اوڑدہی ٹی علاقائی حالیت، اہم جہانی امور تون اوار تین پہ تینی است خواہی نا باندات آ گپ وتران کرے۔ وزیر خارجہ پارے کہ پاکستان، عرب لیگ نا باسک ملک آتے خصوصی اہمیت ایتک۔ اسہ وڑ مذہبی، تہذیبی قدر انا ناطہ عرب لیگ نا غٹ باسک ملک آتون پاکستان نا سوگو سیاسی، واپاری، تین پہ تینی رابطہ ءِ۔ پاکستانی پردیسی تا بھلو کچ اس عرب ملک آتیٹی رہینگ انگ ءُ۔ شاہ محمود قریشی پارے کہ نن سمجھنہ کہ عرب ملک آتون پاکستان نا مراسم عرب لیگ اتون خصوصی تعلق نا درشانی ءِ۔ پاکستان و عرب لیگ نا نیام اٹ مفاہمتی یات داشت نا حوالہ ءِ ترسا اوتین پہ تینی کمک و ہم آہنگی نا کمک اٹ دافریم ورک ءِ عملی ءُ دروشم اس تننگ نا گرج آ زورشاغا۔ ہڑتوم آ راہشون تا نیام اٹ دا بابت سلابت ءِ برجاتخنگ آ امنا کننگا۔ وزیر خارجہ سیکرٹری جنرل عرب لیگ ءِ اوغانستان اٹ امن کن پاکستان نا کنڈآن کروک آ خیرخواہی کوشست و اونا بھرم تیان معلومدار کرے۔ وزیر خارجہ 5 اگست 2019ء نا اسہ کنڈی بھارتی گام آن پد مقبوضہ جموں و کشمیر اٹ بھارت سرکارنا کنڈآن برجاانسانی حق انا بھلا خلاف ورزی و علاقائی امن ءِ مون تروک گڑتی تیان معلومدار کرے۔ وزیر خارجہ اہم امور آ عرب لیگ نا پیدوار و اسہ وڑ موقف ءِ سیکرٹری جنرل نا گیشتر سفارتی آزموندہ غاتا بھرم گوندا وگمان ظاہر کرے کہ عرب لیگ تنظیم سیکرٹری جنرل نا گیشتر آزموندہ و کسبی چاہنداری آن جوان فائدہ ہرفک۔
