اسلام آباد۔ 18 فروری (اے پی پی) وزیراعظم عمران خان پارت کرینے کہ غیر کانودی شکار و درخت آتا کٹائی نا توننگ کن منظم گام گیج کننگے، جنگل آتا بحالی کن سوگو ءُ پالیسی اس مرتب کننگے و پوسکن آ ٹیکنالوجی ءِ کاریم اٹ اتنگے۔ او پنچ شنبے نادے آ صوبہ پنجاب اٹی جنگل آتا رکھ و بحالی نا بابت اڈ ہلوک آ دیوان نا کماشی ءِ کریکہ۔ دیوان اٹی خصوصی کمکار ماحولیاتی بدلی امین اسلم، وزیر جنگلات پنجاب سبطین خان و ایلوفک ہم ساڑی ئسر۔ دیوان اٹی وزیراعظم عمران خان ءِ چھانگا مانگا و ایلو جنگل آتا بحالی نا بابت کروک آ گام گیج آتیا حوال تننگا۔ تدوک آ منہ سال اٹ چھانگا مانگا نا دونیم ہزار ایکڑ رقبہ ءِ درخت آتیان محروم کرسا بنجر جوڑ کننگا۔ وزیراعظم ءِ حوال اٹ پاننگاکہ ساڑی آ دورحکومت اٹ 10 بلین ٹری سونامی مہم اٹ اسہ ہزار ایکڑ رقبہ غا شجرکاری ناعمل ءِ پورو کننگانے، دونیم ہزار ایکڑ رقبہ غا سال 2023اسکان دا عمل ءِ پورو کننگک۔ وزیراعظم پارے کہ چاگڑدی کچٹی نا اثرآتے کم کننگ نا بابت جنگل و شجرکاری کلیدی اہمیت تخک و جنگل آتا رکھ و بحالی ساڑی حکومت نا اولیت آتا حصہ ءِ۔ وزیراعظم پارت کرے کہ جنگل آتا رکھ و بحالی کن ٹیکنالوجی ءِ کاریم اٹ اتنگے و مچ آ صوبہ ٹی جنگل آتا بحالی کن مربوط پالیسی اس مرتب کرسا پیش کننگے۔ اوپارے کہ غیر کانودی شکار و درخت آتا کٹائی نا توننگ نا بات ہم منظم گام گیج آتے پک کننگے۔
